शुद्ध आणि सुधारित मतदार याद्या जाहीर करा!शिवसेना - उद्धव बाळासाहेब ठाकरे शिष्टमंडळाच्या वतीने निवेदन

महाराष्ट्र वाणी

छत्रपती संभाजीनगर(औरंगाबाद) दि २६ :- महानगरपालिकेच्या मतदार यादीमध्ये अतिगंभीर अनियमितता आढळून आल्या आहेत.एका प्रभागातील हजारो मतदारांचे नावे कोणतीही कारणे न देता इतर प्रभागांमध्ये स्थलांतरित करण्यात आली आहेत.काही मतदारांचे नाव, पत्ता, प्रभाग क्रमांक चुकीचा, तसेच काहींची नावे एकापेक्षा अधिक प्रभागांत दिसत आहेत, तर काहींची नावे यादीतून गायब दिसत असल्याने शुद्ध आणि सुधारित मतदार याद्या जाहीर करा या मागणीसाठी शिवसेना - उद्धव बाळासाहेब ठाकरे पक्षाच्या शिष्टमंडळाच्या वतीने बुधवार, ता. 26 नोव्हेंबर रोजी मनपा आयुक्त जी. श्रीकांत यांना निवेदन देण्यात आले. 

महाराष्ट्र विधानसभा निवडणूक - २०२४ मधील निवडणूक मतदार यादीत चिन्हांकित केलेले दुबार मतदार, मृत्यू पावलेले मतदार प्रारूप मतदार यादीतून वगळणे अपेक्षित होते. निवडणूक आयोगाच्या मार्गदर्शक सूचनाप्रमाणे मतदार यादी तयार करणाऱ्या बीएलओ यांनी स्थळ पाहणी करून प्रारूप मतदार यादी तयार करायला हवी होती. मात्र, प्रारूप मतदार यादीतील गंभीर चुका, गोंधळ,हजारो मतदारांचे प्रभागाबाहेर स्थलांतर,चुकीच्या नोंदी, मतदारांचे दुबार नावे व अनियमिता बघता बीएलओ यांनी कार्यालयात बसूनच मतदार याद्या तयार केल्या असल्याचा प्रश्न यावेळी उपस्थित करण्यात आला. 

सदरील स्थिती केवळ प्रशासनातील हलगर्जीपणा दर्शवत नाही तर निवडणूक यंत्रणेवर शंका निर्माण करणारी आहे. महानगरपालिकेच्या निवडणुका मध्ये अशा गंभीर चुका उद्भवणे अत्यंत गंभीर चिंतेची बाब असून त्या दुरुस्त करणे आवश्यक असल्याची मागणी यावेळी शिष्टमंडळाने केली. सर्व प्रभागांतील मतदार याद्यांची तत्काळ पुन्हा तपासणी करण्यात यावी,चुकीने दुसऱ्या प्रभागात टाकलेले सर्व मतदार मूळ प्रभाग यादीत समाविष्ट करण्यात यावे, मतदाराना योग्य ती माहिती देण्यासाठी विशेष मदत केंद्रे सुरु करावी,मतदार यादी तयार करण्याच्या प्रक्रियेत झालेल्या चुकांबाबत जाब मागून जबाबदार निवडणूक प्रक्रियेतील अधिकाऱ्यांवर कारवाई करण्यात यावी, सुधारित व शुद्ध मतदार याद्या सार्वजनिकपणे पुन्हा प्रसिध्द करण्यात याव्यात, अशा शिवसेना - उद्धव बाळासाहेब ठाकरे पक्ष, छ. संभाजीनगराच्या वतीने करण्यात आल्या. सदरील मागण्या मान्य करण्यात आल्या नाहीतर अन्यथा तीव्र आंदोलन छेडण्यात येईल, अशा इशारा यावेळी देण्यात आला. 

याप्रसंगी शिवसेना नेते चंद्रकांत खैरे,आंबदास दानवे राजू वैद्य, गिरीजाराम हाळनोर,आनंद तांदूळवाडीकर, राजू इंगळे,विठ्ठल बदर,लक्ष्मीनारायण बाखरिया, शहरप्रमुखबाळासाहेब थोरात, हरिभाऊ हिवाळे, ज्ञानेश्वर डांगे, दिग्विजय शेरखाने,जिल्हा संघटक आशा दातार, महानगर संघटक मीना फसाटे, सुकन्या भोसल, विधानसभा संघटक वीरभद्र गादगे, माजी नगरसेवक सचिन खैरे,कमलाकर जगताप,उपशहरप्रमुख मंगेश भाले, राजेंद्र दानवे, प्रमोद ठेंगडे, दिनेश राजे भोसले, गणेश लोखंडे, मुकेश खिल्लारे, प्रितेश जैस्वाल, विभागप्रमुख नंदू लबडे, संतोष बारसे, विनोद सोनवणे, सूर्यकांत कुलकर्णी, विशाल राऊत,सम्राट वानखेडे, अभिजीत थोरात, रामेश्वर कोरडे व मुजाहीद कुरेशी उपस्थित होते.