🔴 फर्दापूर पाणीटंचाईवर दिलासा; २-३ दिवसांत पाणीपुरवठा सुरळीत होणार

Apr 10, 2026 - 23:38

🔴 फर्दापूर पाणीटंचाईवर दिलासा; २-३ दिवसांत पाणीपुरवठा सुरळीत होणार

महाराष्ट्र वाणी

सोयगाव, दि. १० :- ता. सोयगावातील फर्दापूर परिसरात निर्माण झालेल्या भीषण पाणीटंचाईच्या पार्श्वभूमीवर प्रशासनाने तातडीने हालचाली सुरू केल्या आहेत. जिल्हा परिषदेचे अध्यक्ष अविनाश गलांडे, मुख्य कार्यकारी अधिकारी साळुंके यांच्यासह गटविकास अधिकारी, उपअभियंता आदी अधिकाऱ्यांनी आज फर्दापूर येथे भेट देत परिस्थितीचा आढावा घेतला.

यावेळी अधिकाऱ्यांनी पाणीटंचाईग्रस्त गावांमध्ये जाऊन ग्रामस्थांशी थेट संवाद साधत त्यांच्या अडचणी जाणून घेतल्या. अध्यक्ष गलांडे यांनी सांगितले की, पाणीपुरवठा सुरळीत करण्यासाठी युद्ध पातळीवर पाइपलाइन दुरुस्तीचे काम हाती घेण्यात आले असून, पुढील २ ते ३ दिवसांत पाणीपुरवठा सुरू होण्याची शक्यता आहे.

तसेच तोंडापूर ते फर्दापूर दरम्यान असलेल्या पाणीपुरवठा लाईनमधील गळती (लिकेज) दुरुस्तीसाठी अंदाजपत्रक तयार करून लवकरच मंजुरीसाठी सादर करण्यात येणार असल्याचेही त्यांनी स्पष्ट केले.

या पाहणी दौऱ्यावेळी सिद्धेश्वर सहकारी साखर कारखान्याचे चेअरमन ज्ञानेश्वर पाटील मोठे, महाराष्ट्र अल्पसंख्याक अध्यक्ष इद्रिस मुलतानी, सभापती उत्तम चव्हाण, राहुल राठोड यांचीही उपस्थिती होती.

👉 “युद्ध पातळीवर सुरू असलेल्या कामांमुळे फर्दापूरकरांना लवकरच पाण्याचा दिलासा मिळणार,” असा विश्वास प्रशासनाने व्यक्त केला आहे.