न्यू हनुमान नगरमध्ये पैठणीचा खेळ : शिवसेना नेते अंबादास दानवे यांची उपस्थिती, माजी नगरसेवक आत्माराम पवार यांचा उपक्रम

महाराष्ट्र वाणी न्युज 

छत्रपती संभाजीनगर(औरंगाबाद) दि ५ :- शिवसेना (उद्धव बाळासाहेब ठाकरे) पक्षाचे माजी नगरसेवक आत्माराम पवार यांच्या वतीने गणेश उत्सवानिमित्त न्यू हनुमान नगर येथे खेळ पैठणीचा कार्यक्रम उत्साहात पार पडला. या कार्यक्रमास विधान परिषदेचे विरोधी पक्षनेते तथा शिवसेना नेते अंबादास दानवे यांनी उपस्थित राहून शुभेच्छा दिल्या.

माजी नगरसेवक आत्माराम पवार हे सातत्याने पक्षाच्या माध्यमातून परिसरातील नागरिकांसाठी विविध सांस्कृतिक कार्यक्रमांचे आयोजन करीत असतात. गणेश उत्सवाच्या पार्श्वभूमीवर त्यांनी परिसरातील नागरिकांचा उत्साह द्विगुणित करण्यासाठी विविध सांस्कृतिक उपक्रम आणि खेळांचे आयोजन केले आहे. विशेषतः भगिनींच्या आनंदासाठी "पैठणीचा खेळ" आयोजित करून पवार यांनी कौतुकास्पद पाऊल उचलले.

या उपक्रमामुळे परिसरातील महिला व नागरिकांमध्ये आनंदाचे वातावरण निर्माण झाले असून सामाजिक व सांस्कृतिक ऐक्य वृद्धिंगत होण्यास हातभार लागला आहे. आत्माराम पवार यांनी आपल्या नगरसेवकपदाच्या काळापासून विकासात्मक आणि मूलभूत सोयीसुविधा पुरविण्याबरोबरच सांस्कृतिक जडणघडीलाही प्राधान्य दिले असल्याचे नागरिकांनी नमूद केले.

या प्रसंगी सौ. अनुराधा दानवे, शिवसेना उपजिल्हाप्रमुख विजय वाघमारे, संतोष खेंडके, शहरप्रमुख दिग्विजय शेरखाने, महिला आघाडी महानगर संघटक सुकन्या भोसले आदी मान्यवर उपस्थित होते.

 संस्कृती आणि सामाजिक ऐक्याची पैठणी – गणेशोत्सवात लोकसहभागाची नवी उधळण!