मराठवाडा पदवीधर निवडणुकीची तयारी पूर्ण; ८४२ केंद्रांवर उद्या मतदान, पथके साहित्यासह रवाना

छत्रपती संभाजीनगर (औरंगाबाद), दि. २२ :- मराठवाडा विभाग पदवीधर मतदारसंघाच्या निवडणुकीसाठी प्रशासनाची तयारी पूर्ण झाली असून, आठही जिल्ह्यांतील मतदान पथके मतपेट्या आणि आवश्यक साहित्य घेऊन संबंधित केंद्रांकडे रवाना झाली आहेत. शुक्रवार, २३ ऑक्टोबर रोजी सकाळी ८ ते दुपारी ४ या वेळेत विभागातील ८४२ मतदान केंद्रांवर मतदान प्रक्रिया पार पडणार आहे.

विभागीय आयुक्त तथा निवडणूक निर्णय अधिकारी जी. श्रीकांत यांच्या मार्गदर्शनाखाली संपूर्ण विभागात निवडणुकीची तयारी करण्यात आली आहे. छत्रपती संभाजीनगर, जालना, बीड, लातूर, धाराशिव, परभणी, नांदेड आणि हिंगोली या आठ जिल्ह्यांमध्ये मतदानाची यंत्रणा सज्ज झाली आहे. संबंधित जिल्ह्यांचे जिल्हाधिकारी सहायक निवडणूक निर्णय अधिकारी म्हणून जबाबदारी सांभाळत आहेत.

गुरुवारी तालुकानिहाय वितरण केंद्रांवरून नियुक्त मतदान पथकांना मतपेट्या, मतपत्रिका आणि अन्य आवश्यक मतदान साहित्याचे वाटप करण्यात आले. साहित्य ताब्यात घेतल्यानंतर अधिकारी व कर्मचारी आपापल्या नियुक्त मतदान केंद्रांकडे रवाना झाले. छत्रपती संभाजीनगर तालुक्यातील पथकांना शासकीय अभियांत्रिकी महाविद्यालयातून मतदान साहित्याचे वितरण करण्यात आले. इतर तालुक्यांमध्येही ही प्रक्रिया पूर्ण करण्यात आली.

आठ जिल्ह्यांत ८४२ मतदान केंद्रे

या पदवीधर मतदारसंघात जिल्हानिहाय मतदान केंद्रांची संख्या पुढीलप्रमाणे आहे.

- छत्रपती संभाजीनगर – २१७

- जालना – ८९

- बीड – १४०

- लातूर – ८८

- धाराशिव – ७६

- परभणी – ७६

- नांदेड – १२०

- हिंगोली – ३६

अशा प्रकारे एकूण ८४२ मतदान केंद्रांवर मतदान होणार आहे. या निवडणुकीच्या रिंगणात ४१ उमेदवार असून, एकूण ३ लाख २६ हजार ७०१ मतदार मतदानासाठी पात्र आहेत.

पसंतीक्रमाने मतदान; प्रशासनाचे आवाहन

पदवीधर मतदारसंघाच्या निवडणुकीत मतदारांना मतपत्रिकेवर उमेदवारांसाठी पसंतीक्रम नोंदवावा लागणार आहे. त्यामुळे मतदान करण्यापूर्वी मतदारांनी मतदानाची पद्धत समजून घेऊन मतपत्रिकेवरील सूचना काळजीपूर्वक पाळाव्यात.

मतदान प्रक्रिया शांततेत, निर्भय आणि पारदर्शक वातावरणात पार पाडण्यासाठी सर्व संबंधित यंत्रणांनी समन्वयाने काम करावे. मतदानाच्या दिवशी कोणतीही अडचण उद्भवल्यास तातडीने उपाययोजना कराव्यात, असे निर्देश निवडणूक निर्णय अधिकारी जी. श्रीकांत यांनी संबंधित अधिकारी व कर्मचाऱ्यांना दिले आहेत.

आता उद्या होणाऱ्या मतदानाकडे आठही जिल्ह्यांतील पदवीधर मतदारांचे लक्ष लागले आहे.

महाराष्ट्र वाणी | सत्यासाठी निर्भीड, जनतेसाठी समर्पित