जळगावचा शूर सुपुत्र ठरला महाराष्ट्राचा अभिमान! CRPF जवान जावेद अहमद यांना ६० लाखांची मदत

महाराष्ट्र वाणी

जळगाव ( वा.) दि १२ :- देशसेवेत अद्वितीय शौर्य दाखवणाऱ्या जळगावच्या सुपुत्र आणि CRPF जवान जावेद अहमद यांना महाराष्ट्र शासनाकडून ६० लाख रुपयांची आर्थिक मदत देण्यात आली आहे. ‘महाराष्ट्र गौरव पुरस्कार योजना’ अंतर्गत मंजूर झालेल्या या मदतीचा धनादेश १० एप्रिल २०२६ रोजी जिल्हाधिकारी कार्यालयात पालकमंत्री गुलाबराव पाटील यांच्या हस्ते प्रदान करण्यात आला.

१८ एप्रिल २०२० रोजी जम्मू-काश्मीरमधील बारामुल्ला (सोपोर) येथे दहशतवाद्यांनी जवानांच्या ताफ्यावर अचानक हल्ला चढवला होता. या भीषण गोळीबारात गंभीर जखमी होऊनही जावेद अहमद यांनी विलक्षण धैर्य दाखवत वाहन सुरक्षित ठिकाणी नेले आणि आपल्या सहकाऱ्यांचे प्राण वाचवले. या प्रसंगी त्यांच्या डाव्या हाताला गंभीर दुखापत झाली असून त्यांना ७४ टक्के कायमस्वरूपी अपंगत्व आले आहे.

अशा कठीण परिस्थितीतही न खचता जावेद अहमद आजही देशसेवेत कार्यरत असून त्यांच्या जिद्दीचे आणि समर्पणाचे सर्वत्र कौतुक होत आहे. त्यांच्या या पराक्रमाची दखल घेत राज्य शासनाने आर्थिक मदतीच्या माध्यमातून त्यांचा सन्मान केला आहे.

या प्रसंगी जिल्हा प्रशासनातील अधिकारी उपस्थित होते. संबंधित छायाचित्रात जावेद अहमद यांच्यासोबत पालकमंत्री गुलाबराव पाटील आणि अन्य अधिकारी दिसत आहेत.

देशासाठी लढणाऱ्यांचा सन्मान म्हणजेच आपल्या कर्तव्याची जाणीव — आणि जावेद अहमद यांची कहाणी त्याचे जिवंत उदाहरण आहे!