२६.३४ लाख अपात्र लाभार्थ्यांचा ‘लाडकी बहीण’ लाभ तात्पुरता स्थगित – पात्रतेची पुन्हा शहानिशा सुरू

महाराष्ट्र वाणी न्युज 

मुंबई दि २७ जुलै:- महिला व बालकल्याण मंत्री आदिती तटकरे यांनी माहिती दिली की मुख्यमंत्री माझी लाडकी बहीण योजनेअंतर्गत पात्र लाभार्थ्यांची ओळख पटवण्यासाठी महिला व बालविकास विभागाने शासनाच्या विविध विभागांकडून माहिती मागवली होती. माहिती व तंत्रज्ञान विभागाच्या अहवालानुसार, सुमारे २६.३४ लाख लाभार्थी हे अपात्र असतानाही या योजनेचा लाभ घेत असल्याचे उघड झाले आहे.

या तपासणीमध्ये काही लाभार्थ्यांनी एकापेक्षा अधिक योजना घेतल्याचे, काही कुटुंबांमध्ये दोनपेक्षा अधिक लाभार्थी असल्याचे, तर काही अर्ज पुरुषांनी केल्याचेही निदर्शनास आले आहे.

या आधारे, जून २०२५ पासून या २६.३४ लाख लाभार्थ्यांचा लाभ तात्पुरता स्थगित करण्यात आला आहे. दरम्यान, पात्र असलेल्या सुमारे २.२५ कोटी महिलांना जून महिन्याचा सन्माननिधी वितरित करण्यात आला आहे.

स्थगित लाभार्थ्यांपैकी पात्र ठरणाऱ्यांची जिल्हाधिकारी पातळीवर शहानिशा करण्यात येणार असून, जे पात्र ठरतील त्यांना पुन्हा लाभ सुरू करण्यात येईल, अशी माहिती तटकरे यांनी दिली.

शासनाची दिशाभूल करून बनावट स्वरूपात लाभ घेतलेल्या व्यक्तींवर काय कारवाई करायची याबाबत मुख्यमंत्री देवेंद्र फडणवीस, उपमुख्यमंत्री एकनाथ शिंदे व अजित पवार यांच्यासोबत चर्चा करून लवकरच निर्णय घेतला जाईल, असेही त्यांनी स्पष्ट केले.

 अशीच अधिकृत व ताजी अपडेट्ससाठी वाचा [महाराष्ट्र वाणी.com]