"लोकशाही बळकट करणे प्रत्येक अधिकारी-कर्मचारीचा कर्तव्य: प्रशासक जी श्रीकांत"! निवडणूक त्यारीचा घेतला आढावा

महाराष्ट्र वाणी 

छत्रपती संभाजीनगर( औंगाबाद), दि २५ :- महापालिका निवडणुकीसाठी तयार करण्यात आलेल्या प्रारुप मतदार याद्यांमधील चुकांमुळे सूचना - हरकतींचे प्रमाण वाढू लागले आहे. या पार्श्वभूमीवर पालिकेचे प्रशासक जी. श्रीकांत यांनी मंगळवारी सायंकाळी अधिकाऱ्यांची बैठक घेतली. मतदार यादीमधील चुका ही गंभीर बाब आहे, चुका दुरुस्त करण्याची संधी आपल्याला आहे. यापुढे जर चुका झाल्याचे निदर्शनास आले तर संबंधितांना सरळ घरी पाठवेन असा इशारा त्यांनी दिला. 

महापालिका निवडणुकीसाठी प्रारुप मतदार यादी प्रसिध्द करण्यात आली आहे. या यादीवर मोठ्या प्रमाणावर सूचना आणि हरकती पालिका प्रशासनाकडे प्राप्त होऊ लागल्या आहेत. या पार्श्वभूमीवर प्रशासक जी. श्रीकांत यांनी मंगळवारी (२५ नोव्हेंबर) सायंकाळी सर्व संबंधित अधिकाऱ्यांची बैठक घेतली आणि सूचना केल्या.

 प्रशासकांनी अधिकाऱ्यांशी संवाद साधताना निवडणुकीच्या कामाचे महत्व विशद केले. मतदार याद्यांमध्ये झालेल्या चुकांबद्दल बोलताना ते म्हणाले, आतापर्यंतच्या चुका मी समजू शकतो पण यापुढे चुकांना माफी दिली जाणार नाही, थेट घरी पाठवण्यात येईल. झालेल्या चुकांना निपटारा करा. शहराच्या प्रत्येक भागात फिरुन मतदारांच्या नावांची, त्यांच्या निवासस्थानाची शहानिशा करा असे आदेश त्यांनी दिले. 

पालिका क्षेत्रात १३०० मतदान केंद्र स्थापन करण्यात येणार आहेत. प्रत्येक मतदान केंद्राची वॉर्ड अधिकाऱ्याने पाहणी करावी, तेथील सोईसुविधांचा आढावा घ्यावा, ज्या सुविधा त्या ठिकाणी नसतील त्या उपलब्ध करुन देण्यासाठीचे नियोजन करावे अशी सूचना प्रशासक जी. श्रीकांत यांनी वॉर्ड अधिकाऱ्यांना केली. 

 *उद्यापासून प्रत्येक वार्ड कार्यालयात हेल्प डेस्क* 

मा राज्य निवडणूक आयोगाच्या सूचनेनुसार उद्यापासून प्रत्येक वॉर्ड कार्यालयात मतदार यादी मधील मतदारांची नावे शोधून देण्यासाठी दोन कर्मचारी नेमून देण्यात येणार आहेत. हेल्पडेस्कच्या माध्यमातून हे कर्मचारी मतदारांची नावे व त्यांचा प्रभाग शोधून देतील.  

 *या वेबसाईटवर शोधता येणार नाव* 

राज्य निवडणुक आयोगाच्या https://mahasecvoterlist.in/ या वेबसाईटवर Search name in voter list या टॅबमध्ये स्थानिक स्वराज्य संस्थेच्या मतदार यादीतील मतदाराचे नाव शोधण्याची सुविधा देण्यात आली आहे. महापालिकेच्या वेबसाईटवर ही लिंक उपलब्ध करुन देण्यात आली आहे. 

-