“प्रचंड उष्णतेत सावध राहा; पंतप्रधान मोदींचा देशवासियांना महत्त्वाचा संदेश”

महाराष्ट्र वाणी

नवी दिल्ली (प्रतिनिधी) दि २७ :- देशभरात वाढत्या उष्णतेच्या पार्श्वभूमीवर पंतप्रधान Narendra Modi यांनी देशवासियांना महत्त्वाचे आवाहन केले आहे. भीषण उकाडा आणि वाढत्या तापमानामुळे नागरिकांनी विशेष काळजी घ्यावी, स्वतःला हायड्रेटेड ठेवावे आणि घराबाहेर पडताना पाणी सोबत ठेवावे, असे त्यांनी म्हटले आहे.

पंतप्रधानांनी नागरिकांना केवळ स्वतःचीच नव्हे तर समाजातील इतरांचीही काळजी घेण्याचे आवाहन केले. “एखाद्या तहानलेल्या व्यक्तीला एक ग्लास पाणी देणे ही मोठी मानवसेवा ठरू शकते,” असे सांगत त्यांनी घराबाहेर, दुकानांसमोर किंवा सार्वजनिक ठिकाणी पाण्याचे मडके ठेवणाऱ्यांचे कौतुक केले.

उष्माघात, चक्कर येणे, मळमळ किंवा अतिशय थकवा जाणवणे यासारखी लक्षणे दुर्लक्षित करू नयेत, असा इशाराही त्यांनी दिला. एखादी व्यक्ती अचानक बेशुद्ध पडल्यास किंवा अशक्त वाटत असल्यास तिला तात्काळ सावलीत किंवा थंड जागी हलवून पाणी, ORS किंवा इतर द्रवपदार्थ द्यावेत, असे आवाहन त्यांनी केले.

लहान मुले, ज्येष्ठ नागरिक आणि उन्हात काम करणारे कामगार हे सर्वाधिक धोक्यात असल्याचे सांगत, योग्य वेळी काळजी घेतली नाही तर ही स्थिती ‘हीटस्ट्रोक’सारख्या गंभीर समस्येत रूपांतरित होऊ शकते, असे मोदी यांनी स्पष्ट केले.

याचबरोबर त्यांनी कुटुंबातील आई-वडील, आजी-आजोबा आणि इतर प्रियजनांची विचारपूस करण्याचे आवाहन करत, त्यांना पुरेसे पाणी पिण्याचा आणि दुपारच्या कडक उन्हात बाहेर न पडण्याचा सल्ला देण्यास सांगितले.

मानवांसोबतच पशु-पक्ष्यांचीही काळजी घेण्याचे आवाहन करताना त्यांनी घर, गच्ची, बाल्कनी, दुकान किंवा कार्यालयाबाहेर पाण्याचे छोटे भांडे ठेवण्याचे आवाहन केले. “या कठीण काळात संवेदनशीलता आणि करुणा जपणे हीच खरी माणुसकी आहे,” असा भावनिक संदेश पंतप्रधानांनी देशवासियांना दिला.

“या प्रचंड उष्णतेत एक ग्लास पाणी आणि थोडीशी माणुसकी… कुणाचातरी जीव वाचवू शकते!”