‘महाराष्ट्राची लेक देशात नंबर वन!’ नाशिकमध्ये शिक्षण घेणाऱ्या साक्षी जैनची CA Foundation मध्ये AIR-1 वर मोहोर

महाराष्ट्र वाणी

छत्रपती संभाजीनगर (औरंगाबाद) दि ५ :- "मोठी स्वप्नं पाहायची असतील, तर त्यासाठी तितकीच मोठी मेहनत घ्यावी लागते," हे वाक्य साक्षी जैन हिने आपल्या यशातून सिद्ध करून दाखवले आहे.

'द इन्स्टिट्यूट ऑफ चार्टर्ड अकाउंटंट्स ऑफ इंडिया' (ICAI) आयोजित मे २०२६ च्या CA Foundation परीक्षेत नाशिकमध्ये शिक्षण घेणाऱ्या साक्षी जैन हिने देशभरात अव्वल स्थान पटकावत ऑल इंडिया रँक-1 (AIR-1) मिळवला आहे. तिने ४०० पैकी तब्बल ३७१ गुण मिळवत ९२.७५ टक्के गुणांची चमकदार नोंद केली.

विशेष बाब म्हणजे साक्षी ही मूळची जळगाव जिल्ह्यातील पाचोरा येथील रहिवासी आहे. चार्टर्ड अकाउंटंट होण्याचे ध्येय डोळ्यासमोर ठेवून ती नाशिकमध्ये शिक्षणासाठी आली होती. दररोज १० ते १२ तासांचा अभ्यास, सातत्यपूर्ण मेहनत, शिस्त आणि स्वतःवरचा दृढ विश्वास यांच्या जोरावर तिने हे यश संपादन केले.

तिच्या विषयनिहाय गुणांनीही अनेकांना प्रेरणा दिली आहे. अकाउंटिंगमध्ये तिने ९६ गुण, क्वांटिटेटिव्ह ॲप्टीट्यूडमध्ये ९७ गुण, बिझनेस इकॉनॉमिक्समध्ये ९७ गुण, तर बिझनेस लॉमध्ये ८१ गुण मिळवले.

यंदाच्या CA Foundation परीक्षेत देशभरातून लाखो विद्यार्थी सहभागी झाले होते. त्यापैकी केवळ सुमारे २० टक्के विद्यार्थी उत्तीर्ण झाल्याने परीक्षेची कठीणता अधोरेखित होते. अशा स्पर्धात्मक वातावरणात देशात प्रथम क्रमांक मिळवणे ही अत्यंत उल्लेखनीय कामगिरी मानली जात आहे.

विशेष म्हणजे यंदा देशातील टॉप-३ यादीत महाराष्ट्रातील तिन्ही विद्यार्थ्यांनी स्थान मिळवले असून राज्यासाठी ही अभिमानाची बाब ठरली आहे.

साक्षी जैनचे हे यश केवळ तिच्या कुटुंबासाठीच नव्हे, तर ग्रामीण भागातील विद्यार्थिनींसाठीही प्रेरणादायी ठरत आहे. तिची मेहनत आणि जिद्द अनेक विद्यार्थ्यांना मोठी स्वप्नं पाहण्याची नवी ऊर्जा देणारी ठरेल."विशेष म्हणजे साक्षी जैन ही जळगाव जिल्ह्यातील पाचोरा येथील रहिवासी असून, सीए होण्याचे मोठे स्वप्न घेऊन ती नाशिकमध्ये शिक्षणासाठी आली होती."

मोठी स्वप्नं पूर्ण करण्यासाठी परिस्थिती नव्हे, तर जिद्द मोठी असावी लागते... साक्षी जैनने हे पुन्हा एकदा सिद्ध करून दाखवले!