🚖 “रिक्षा-टॅक्सी चालकांना मोफत मराठी प्रशिक्षण” — प्रवाशांशी मराठीत संवादासाठी शासनाचा पुढाकार

महाराष्ट्र वाणी

मंत्रालय, मुंबई दि २३ :- राज्यातील रिक्षा, टॅक्सी तसेच ई-बाईक टॅक्सी चालकांना प्रवाशांशी मराठीतून संवाद साधता यावा, यासाठी महत्त्वपूर्ण पाऊल उचलण्यात येत आहे. यासाठी मुंबई मराठी साहित्य संघ आणि कोकण मराठी साहित्य परिषद यांच्याशी निगडीत साहित्यिकांनी चालकांना व्यावहारिक मराठी शिकवण्याचा पुढाकार घेतला आहे.

परिवहन मंत्री प्रताप सरनाईक यांच्या अध्यक्षतेखाली मंत्रालयात झालेल्या बैठकीत ही माहिती देण्यात आली. लवकरच यासाठी विशेष अभ्यासक्रम तयार करण्यात येणार असून, चालकांना दैनंदिन वापरातील सोपी आणि उपयुक्त मराठी शिकवली जाणार आहे.

या बैठकीस परिवहन आयुक्त राजेश नार्वेकर, मराठी भाषा विभागाचे उपसचिव नामदेव भोसले, तसेच राज्य मराठी विकास संस्थेचे संचालक डॉ. शामकांत देवरे यांच्यासह विविध तज्ज्ञ आणि साहित्यिक उपस्थित होते.

कोकण मराठी साहित्य परिषद आपल्या ७२ शाखांमधून शिकवणी वर्ग सुरू करण्यास सज्ज असून, मुंबई मराठी साहित्य संघाने स्वयंसेवी शिक्षकांच्या माध्यमातून ऑनलाइन प्रशिक्षण देण्याची तयारी दर्शविली आहे. विशेष म्हणजे, या प्रशिक्षणासाठी चालकांकडून कोणतेही शुल्क आकारले जाणार नाही.

वाहनचालकांमध्ये मराठी भाषेबद्दल आत्मीयता निर्माण व्हावी आणि प्रवाशांशी सुलभ संवाद व्हावा, यासाठी हा उपक्रम महत्त्वाचा ठरणार असल्याचे मंत्री सरनाईक यांनी स्पष्ट केले.

👉 “मराठी संवादातून प्रवास अधिक जवळचा — चालक-प्रवासी नातं आणखी मजबूत होणार!”