📰 ओबीसी चळवळीचा बुलंद आवाज हरपला; शब्बीर अन्सारींना भावपूर्ण श्रद्धांजली

महाराष्ट्र वाणी

मुंबई,( वा.) दि. ९ :- छगन भुजबळ यांनी अखिल भारतीय महात्मा फुले समता परिषदेचे प्रदेश सरचिटणीस तसेच ऑल इंडिया ओबीसी मुस्लिम संघटनेचे संस्थापक अध्यक्ष दिवंगत शब्बीर अहमद अन्सारी यांना श्रद्धांजली अर्पण करण्यासाठी मुंबईत आयोजित शोकसभेस उपस्थिती लावली.

यावेळी त्यांनी शब्बीर अन्सारींना भावपूर्ण श्रद्धांजली अर्पण करत ओबीसी आरक्षण चळवळीतील त्यांच्या संघर्षमय प्रवासाच्या आठवणींना उजाळा दिला. “शब्बीरभाई हे माझे अत्यंत विश्वासू आणि खंदे सहकारी होते. त्यांच्या निधनामुळे माझे वैयक्तिक मोठे नुकसान झाले असून ओबीसी चळवळीचा एक बुलंद आवाज समाजाने गमावला आहे,” अशा भावना भुजबळ यांनी व्यक्त केल्या.

मंडल आयोगाच्या शिफारशी लागू करण्यासाठी आणि बहुजन समाजाला न्याय मिळवून देण्यासाठी अनेक दशके खांद्याला खांदा लावून संघर्ष केल्याचे त्यांनी सांगितले. मुस्लिम ओबीसी समाजाला आरक्षणाच्या प्रवाहात आणण्यासाठी शब्बीर अन्सारी यांनी दिलेले योगदान अमूल्य असल्याचेही त्यांनी अधोरेखित केले.

या शोकसभेस हजरत सैय्यद मोईन मियाँ अशरफ यांच्यासह मुंबईतील विविध मुस्लिम राजकीय पक्ष व सामाजिक संघटनांचे प्रमुख नेते मोठ्या संख्येने उपस्थित होते.

👉 ओबीसी हक्कांसाठी आयुष्यभर झगडलेला एक लढवय्या नेता आज हरपला — त्यांच्या कार्याची प्रेरणा कायम जिवंत राहणार!