"विकासाच्या नावावर शिंदेंसोबत गेलेले खासदारच निधी खर्चात मागे? आकडेवारीतून धक्कादायक चित्र"

महाराष्ट्र वाणी

छत्रपती संभाजीनगर (औरंगाबाद) दि २३ :- विकासाला गती देण्यासाठी आणि मतदारसंघातील प्रलंबित प्रश्न मार्गी लावण्यासाठी आपण शिवसेनेत प्रवेश केला, असा दावा शिंदे गटात काल प्रवेश केलेल्या खासदारांनी केला होता. मात्र आता त्यांच्या मतदारसंघ विकास निधीच्या वापराबाबत समोर आलेल्या आकडेवारीमुळे या दाव्यांवर प्रश्नचिन्ह उपस्थित होत आहे.

उपलब्ध आकडेवारीनुसार, अनेक खासदारांनी मंजूर निधीचा अत्यल्प वापर केल्याचे दिसून येत आहे. काही ठिकाणी कोट्यवधी रुपयांचा निधी शिल्लक असून विकासकामांची संख्या देखील मर्यादित असल्याचे स्पष्ट झाले आहे.

आकडेवारी काय सांगते?

• धाराशीवचे ओमराजे निंबाळकर यांना 18.5 कोटी रुपयांचा निधी मंजूर झाला. त्यापैकी 1.97 कोटी रुपये खर्च झाले असून सुमारे 16.49 कोटी रुपये शिल्लक आहेत. मंजूर 130 कामांपैकी 21 कामे पूर्ण झाली. म्हणजेच सुमारे 10.7 टक्के निधीच वापरण्यात आला.

• मुंबई नॉर्थ ईस्टचे संजय दीना पाटील यांना 14.7 कोटी निधी मंजूर झाला. त्यापैकी फक्त 15.59 लाख रुपये खर्च झाले असून 14 कोटींहून अधिक निधी शिल्लक आहे. विशेष म्हणजे मंजूर 40 कामांपैकी एकही काम पूर्ण झालेले नाही.

• शिर्डीचे भाऊसाहेब वाकचौरे यांनी 14.7 कोटींपैकी केवळ 71.30 लाख रुपये खर्च केले. मंजूर 135 कामांपैकी फक्त दोन कामे पूर्ण झाली.

• परभणीचे संजय जाधव यांनी तुलनेने अधिक निधी वापरला आहे. मंजूर 14.7 कोटींपैकी 3.78 कोटी रुपये खर्च झाले असून 56 पैकी 25 कामे पूर्ण झाली आहेत.

• हिंगोलीचे नागेश आष्टीकर यांनी 19 कोटींपैकी 5.06 कोटी रुपये खर्च केले. मंजूर 79 कामांपैकी 28 कामे पूर्ण झाली आहेत.

• यवतमाळ-वाशिमचे संजय देशमुख यांनी 18.6 कोटींपैकी 1.41 कोटी रुपये खर्च केले असून 106 पैकी केवळ 7 कामे पूर्ण झाल्याचे दिसते.

या आकडेवारीमुळे विकासाच्या मुद्द्यावर राजकीय भूमिका बदलणाऱ्या खासदारांच्या दाव्यांबाबत आता चर्चा रंगू लागली आहे. मात्र या निधी वापरातील विलंबामागे प्रशासकीय प्रक्रिया, मंजुरीतील अडथळे किंवा इतर कारणे आहेत का, याबाबत संबंधित खासदारांची भूमिका अद्याप समोर आलेली नाही.

वाचत राहा ‘महाराष्ट्र वाणी’ — कारण आकड्यांमागचं सत्य आम्ही तुमच्यापर्यंत पोहोचवतो!