माझी लाडकी बहीण योजनेत मोठा दिलासा! ई-केवायसीची मुदत ३१ डिसेंबरपर्यंत वाढवली

महाराष्ट्र वाणी न्युज 

मुंबई (प्रतीनीधी) दि १७ :- राज्यातील कोट्यवधी महिलांना आर्थिक मदत देणाऱ्या मुख्यमंत्री माझी लाडकी बहीण योजनेबाबत सरकारकडून मोठा निर्णय घेण्यात आला आहे. या योजनेत ई-केवायसी अनिवार्य केल्यामुळे अनेक महिलांना अडचणींचा सामना करावा लागत असल्याच्या तक्रारी वाढत होत्या. त्या पार्श्वभूमीवर राज्य सरकारने ई-केवायसीची अंतिम मुदत १८ नोव्हेंबर २०२५ वरून वाढवून ३१ डिसेंबर २०२५ अशी जाहीर केली आहे. याची माहिती महिला व बालविकास मंत्री आदिती तटकरे यांनी दिली.

अनेक भागांमध्ये अलीकडेच नैसर्गिक आपत्तीमुळे महिलांची कागदपत्रे, मोबाईल सुविधा किंवा आवश्यक माहिती उपलब्ध नसल्याने ई-केवायसीमध्ये अडथळे येत होते. काही महिलांच्या वडील किंवा पतींचे निधन झाल्याने त्यांच्या आधारकार्डाशी लिंक असलेल्या मोबाईल नंबरवर ओटीपी येणे शक्य नव्हते. तसेच, अनेक जिल्ह्यांत तांत्रिक कारणांनीही प्रक्रिया थांबत असल्याचे निदर्शनास आले.

या अडचणींचा विचार करून मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री अजित पवार यांच्या मार्गदर्शनाखाली अंतिम मुदतवाढ करण्याचा निर्णय घेण्यात आला.

सरकारच्या नियमानुसार, ज्या महिलांच्या वडील किंवा पती हयात नाहीत किंवा ज्या महिला घटस्फोटित आहेत, त्यांनी स्वतःची ई-केवायसी करून मृत्यू प्रमाणपत्र, घटस्फोट प्रमाणपत्र किंवा न्यायालयीन आदेश यांची प्रत सादर करणे आवश्यक आहे.

राज्य सरकारने स्पष्ट केले आहे की कोणतीही महिला तांत्रिक कारणांमुळे किंवा अपरिहार्य परिस्थितीमुळे योजनेच्या लाभापासून वंचित राहू नये हा शासनाचा स्पष्ट हेतू आहे. त्यामुळे वाढीव कालावधीत सर्व पात्र महिलांनी आपली ई-केवायसी प्रक्रिया पूर्ण करावी, असे आवाहनही करण्यात आले आहे.

महिलांच्या हक्कांसाठी सरकारचा सकारात्मक पाऊल; ई-केवायसीची वाढीव मुदत दिलासा देणारी!