“मंत्री संजय शिरसाट यांची मोठी घोषणा : छत्रपती संभाजीनगरमध्ये 100 ‘पे अ‍ॅण्ड यूज’ शौचालये; सफाई कर्मचाऱ्यांना मिळणार स्वयंरोजगार”

महाराष्ट्र वाणी न्युज 

मुंबई दि १८ :- महानगरपालिका क्षेत्रातील वाढती लोकसंख्या आणि नागरिकांसाठी स्वच्छतेच्या पुरेशा सुविधा नसल्याचे लक्षात घेऊन छत्रपती संभाजीनगर शहरात शंभर नवीन ‘पे अ‍ॅण्ड यूज’ सार्वजनिक शौचालये उभारण्याचा महत्त्वपूर्ण निर्णय घेण्यात आला आहे. शहरातील गर्दीच्या, महत्त्वाच्या आणि नागरिकांना आवश्यक असलेल्या ठिकाणी ही सुविधा उपलब्ध होणार असून त्यामुळे स्वच्छता व्यवस्थेत मोठी सुधारणा होण्याची अपेक्षा आहे.

या शौचालयांच्या दुरुस्ती व देखभालीची जबाबदारी स्थानिक सफाई कर्मचाऱ्यांकडे सोपवण्यात येणार असून त्यामुळे त्यांना स्वयंरोजगाराची संधी उपलब्ध होईल, असे सामाजिक न्याय मंत्री संजय शिरसाट यांनी सांगितले.

या संदर्भातील बैठक मंत्रालयात सामाजिक न्याय मंत्री संजय शिरसाट यांच्या अध्यक्षतेखाली पार पडली. या बैठकीला दूरदृश्य प्रणालीद्वारे छत्रपती संभाजीनगर महानगरपालिकेचे आयुक्त जी. श्रीकांत, महात्मा फुले मागासवर्ग विकास महामंडळाचे व्यवस्थापकीय संचालक बाबासाहेब बेलदार, सामाजिक न्याय विभागाच्या उपसचिव वर्षा देशमुख यांच्यासह वरिष्ठ अधिकारी सहभागी झाले होते.

शहरातील स्वच्छता व्यवस्था मजबूत करण्यासाठी उभारण्यात येणाऱ्या या 100 शौचालयांमुळे नागरिकांना दिलासा मिळणार असून सफाई कर्मचाऱ्यांसाठी रोजगाराचे नवीन दार उघडले जाणार आहे.

 महाराष्ट्र वाणी — लोकांच्या प्रश्नांना आवाज देणारे!