5 ऑक्टोबरनंतर कापसाचं बोंड, मक्याचं कणस तरी शिल्लक राहील का? सरसकट दुष्काळ जाहीर करा!
कापूस आहे, पण बोंड नाही; सोयाबीनच्या शेंगा रिकाम्या, तर मका उभा असूनही कणसात दाणे नाहीत!
Maharashtra Vaani 
छत्रपती संभाजीनगर (औरंगाबाद) दि १८ :- मराठवाड्यात पावसाअभावी कापूस, सोयाबीन आणि मका या प्रमुख खरीप पिकांची अवस्था गंभीर झाली आहे. शेतात पिके उभी दिसत असली तरी प्रत्यक्षात उत्पादन हातातून निसटण्याची परिस्थिती निर्माण झाली असल्याचे शेतकरी सांगत आहेत.
कापसाची झाडे अनेक ठिकाणी दोन फुटांवरच खुंटली आहेत. पात्या आणि फुले गळून पडली असून लागलेली बोंडे करपून गेल्याची शेतकऱ्यांची व्यथा आहे. सोयाबीनच्या शेंगा भरलेल्या नाहीत; अनेक शेंगांमध्ये दाणा तर दूरच, पीठदेखील नसल्याचे शेतकरी सांगत आहेत.
मक्याची परिस्थितीही वेगळी नाही. मक्याची झाडे शेतात उभी आहेत; मात्र कणसंच व्यवस्थित भरले नाहीत. पाण्याअभावी कणसांची वाढ खुंटली असून दाणे भरण्याच्या अवस्थेतच पीक अडकल्याचे शेतकऱ्यांचे म्हणणे आहे.
“पाऊसच नाही झाला तर पीक येणार कुठून?”
अशा गंभीर परिस्थितीत “5 ऑक्टोबरनंतर पंचनामे करू” असे सांगितले जात असल्याने शेतकऱ्यांमध्ये संताप आहे.
“साहेब, 5 ऑक्टोबरपर्यंत वाट पाहिली तर शेतात पंचनामा करण्यासाठी उरणार तरी काय?” असा सवाल शेतकरी करत आहेत.
कापसाची काडी जनावरांकडून खाल्ली जाऊ शकते, सोयाबीनचा भुसा वाऱ्याने उडून जाऊ शकतो आणि उभ्या मक्याची कणसेही पूर्ण भरलेली नसताना पीक वाळण्याची शक्यता आहे. त्यामुळे उशिरा होणाऱ्या पंचनाम्याचा उपयोग काय, असा प्रश्न उपस्थित होत आहे.
तालुक्यातच पाऊस नाही, मग प्रत्येक बांधावर पंचनामा कशासाठी?
शेतकऱ्यांचा सवाल स्पष्ट आहे—ज्या भागात पावसाची परिस्थिती अत्यंत गंभीर आहे, तिथे केवळ प्रत्येक बांधावर पंचनामा करण्याच्या प्रक्रियेत वेळ घालवण्यापेक्षा प्रत्यक्ष परिस्थितीचा व्यापक आढावा घेऊन तातडीने मदत जाहीर करावी.
“कापूस आहे, पण बोंड नाही; सोयाबीन आहे, पण दाणा नाही; मका उभा आहे, पण कणसंच भरले नाही. मग कागदावर पीक उभं दाखवून काय उपयोग?” असा संतप्त सवाल शेतकऱ्यांकडून केला जात आहे.
शेतकऱ्यांच्या प्रमुख मागण्या
कापूस, सोयाबीन आणि मका उत्पादक शेतकऱ्यांनी पुढील मागण्या केल्या आहेत—
पंचनाम्याच्या प्रक्रियेला अनावश्यक विलंब करू नये.
मराठवाड्यातील कापूस, सोयाबीन आणि मका उत्पादक भागात सरसकट दुष्काळ जाहीर करण्याबाबत तातडीने निर्णय घ्यावा.
पात्र शेतकऱ्यांना पीकविम्याची 75 टक्के अग्रीम नुकसानभरपाई तात्काळ द्यावी.
5 ऑक्टोबरची वाट न पाहता आजच शेतकऱ्यांसाठी मदतीची घोषणा करावी.
कापूस, सोयाबीन आणि मका ही पिके हातची गेली तर शेतकऱ्याचे संपूर्ण वर्ष आर्थिक संकटात जाणार आहे. त्यामुळे “पंचनामे नंतर, मदत आधी” अशी भूमिका घेत शेतकऱ्यांना तातडीने आधार द्यावा, अशी मागणी होत आहे.
