🌳 ‘कर्मयोगी’ फाउंडेशनचा हिरवागार संकल्प! २०२५ मध्ये २५०० वृक्ष लावण्याचा संकल्प; नागपूर व अमरावतीत वृक्षदिंडीने घेतली निसर्गसेवेची ग्वाही

महाराष्ट्र वाणी न्युज 

नागपूर (हिंगणा), दि. १८ जुलै :

निसर्ग हीच खरी संपत्ती आहे, हे लक्षात घेत कर्मयोगी फाऊंडेशनने २०२५ साली २५०० वृक्ष लावण्याचा भव्य संकल्प हाती घेतला आहे. गतवर्षी २० गावांत मोठ्या प्रमाणात वृक्षारोपण केल्यानंतर यंदाही फाउंडेशनने आपल्या कार्याची प्रेरक परंपरा टिकवली आहे.

या वर्षीच्या संकल्पानुसार १५०० वृक्ष नागपूर व हिंगणा ग्रामीण भागात लावले जाणार असून १००० वृक्ष अमरावती जिल्ह्यातील धामणगाव तहसीलच्या गावांमध्ये लावले जाणार आहेत. या उपक्रमामागे गावोगाव हिरवळ निर्माण करून, स्वच्छ, सुंदर आणि पर्यावरणपूरक जीवनशैली घडविण्याचा हेतू आहे.

🌿 दहेली गावात वृक्षदिंडीतून शुभारंभ

या संकल्पाचा शुभारंभ १७ जुलै २०२५, गुरुवारी नागपूर जिल्ह्यातील दहेली गावात वृक्षदिंडीद्वारे करण्यात आला. कर्मयोगी फाऊंडेशन, बालाजी हायस्कूल बुटीबोरी, नागपूर फर्स्ट, विदर्भ यूथ ऑर्गनायझेशन व दहेली ग्रामस्थांच्या सहकार्याने घरोघरी २०० वृक्ष लावण्यात आले. टाळमृदंगाच्या गजरात वृक्षदिंडीने गावाला निसर्गसेवेची नवी दिशा दिली.

🌱 "निसर्ग हाच खरा देव" – पंकज ठाकरे

कर्मयोगी फाउंडेशनचे संस्थापक पंकज ठाकरे म्हणाले, “देव मंदिरात नाही, तर निसर्गात आहे. म्हणूनच यावर्षी आम्ही वृक्षदिंडीतून घरोघरी झाडं लावून निसर्ग पूजनाचा अनोखा उपक्रम राबवित आहोत. गावात सुख-समृद्धी नांदावी यासाठी हा हिरवागार संकल्प आहे.”

👥 मान्यवरांचा उत्स्फूर्त सहभाग

वृक्षारोपण कार्यक्रमात विदर्भ यूथ ऑर्गनायझेशनचे अध्यक्ष डॉ. प्रशांत कडू, नागपूर फर्स्टचे डॉ. तन्वीर मिर्झा, बालाजी हायस्कूलचे राजेश पवार, प्रीती मोरे, कापसे सर, रामटेके सर, दहेली जिल्हापरिषद शाळेच्या मुख्याध्यापक नीलिमा महल्ले, ग्रामपंचायत सचिव कैलास मानकर तसेच ग्रामस्थ, विद्यार्थी, शिक्षक आणि कर्मयोगी परिवार मोठ्या संख्येने सहभागी झाले होते.

🌍 हिरवळीतून समाज परिवर्तनाची नांदी

कर्मयोगी फाउंडेशनचा हा उपक्रम पर्यावरणपूरक समाजनिर्मितीच्या दिशेने एक महत्त्वपूर्ण पाऊल आहे. गावात झाडं लावून निसर्गाचं संवर्धन आणि नागरिकांच्या मनात हरित जागरूकता निर्माण करण्याचा त्यांचा संकल्प निश्चितच प्रेरणादायी आहे.

 शेवटी एकच हाक – ‘प्रत्येकाच्या अंगणात एक झाड, हेच निसर्गपूजेचं खरं व्रत!’