दुष्काळग्रस्त शेतकऱ्यांसाठी I.S.L.A.M. पार्टीचा पुढाकार; मुख्यमंत्री फडणवीस यांच्याकडे ५ लाखांचा धनादेश

मालेगाव डि ७ :- महाराष्ट्रातील अनेक भागांमध्ये निर्माण झालेल्या दुष्काळसदृश परिस्थितीमुळे शेतकरी मोठ्या आर्थिक अडचणींचा सामना करत आहेत. पावसाअभावी पिकांचे नुकसान झाल्याने शेतीवर अवलंबून असलेल्या कुटुंबांसमोर आर्थिक संकट उभे राहिले आहे. या पार्श्वभूमीवर शेतकरी बांधवांना मदतीचा हात देण्यासाठी इण्डियन सेक्युलर लार्जेस्ट असेंबली ऑफ महाराष्ट्र (I.S.L.A.M. Party) च्या वतीने सामाजिक बांधिलकी जपत पुढाकार घेण्यात आला आहे.

पार्टीचे संस्थापक तथा माजी आमदार आसिफ शेख यांनी दुष्काळग्रस्त शेतकऱ्यांच्या मदतीसाठी ५ लाख रुपयांचा धनादेश मुख्यमंत्री देवेंद्र फडणवीस यांच्याकडे सुपूर्द केला. यासोबतच दुष्काळामुळे अडचणीत सापडलेल्या शेतकऱ्यांना शासनाकडून तातडीने आणि प्रभावी मदत मिळावी, यासाठी विविध मागण्यांचे निवेदनही सादर करण्यात आले.

राज्यातील अनेक शेतकरी पावसाच्या अनिश्चिततेमुळे आर्थिक संकटात सापडले आहेत. पिकांची अपेक्षित वाढ न होणे, उत्पादनात घट होणे तसेच शेतीवरील खर्च वाढणे यामुळे शेतकऱ्यांवरील आर्थिक भार वाढला आहे. त्यामुळे शासनाने दुष्काळग्रस्त भागाचे वस्तुनिष्ठ सर्वेक्षण करून नुकसानग्रस्त शेतकऱ्यांना तातडीने आर्थिक मदत उपलब्ध करून द्यावी, अशी भूमिका यावेळी मांडण्यात आली.

शेतकऱ्यांना केवळ तात्पुरती मदत न देता त्यांच्या शेतीचे नुकसान, कर्जबाजारीपणा आणि आगामी हंगामातील अडचणी लक्षात घेऊन दीर्घकालीन उपाययोजना करण्याची गरज असल्याचेही निवेदनातून अधोरेखित करण्यात आले.

या भेटीदरम्यान राज्याचे ज्येष्ठ नेते छगन भुजबळ तसेच दादाजी भुसे यांचीही उपस्थिती होती. मालेगावसह महाराष्ट्रातील दुष्काळग्रस्त शेतकऱ्यांच्या प्रश्नांकडे शासनाने गांभीर्याने पाहावे आणि मदतीची प्रक्रिया जलदगतीने राबवावी, अशी अपेक्षा यावेळी व्यक्त करण्यात आली.

दुष्काळाच्या काळात शेतकरी बांधवांच्या पाठीशी उभे राहून आर्थिक मदतीचा हात देण्याचा I.S.L.A.M. पार्टीचा हा उपक्रम सामाजिक बांधिलकीचे उदाहरण ठरत आहे. शेतकऱ्यांना दिलासा मिळण्यासाठी शासनस्तरावर ठोस निर्णय घेऊन त्याची प्रभावी अंमलबजावणी होणे गरजेचे असल्याची भावना यावेळी व्यक्त करण्यात आली.

अखलाख देशमुख -- महाराष्ट्र वाणी