🔥 उष्मा लाटेचा इशारा; ‘भरपूर पाणी प्या’ – मनपा आरोग्य विभागाचे आवाहन

 महाराष्ट्र वाणी

छत्रपती संभाजीनगर(औरंगाबाद)दि. १३ :- उन्हाळ्याची तीव्रता दिवसेंदिवस वाढत असताना नागरिकांनी उष्मा लाटेपासून बचाव करण्यासाठी काळजी घेणे अत्यावश्यक झाले आहे. याच पार्श्वभूमीवर छत्रपती संभाजीनगर महानगरपालिका आरोग्य विभागाच्या वतीने महत्त्वाचे आवाहन करण्यात आले आहे.

मा. आयुक्त अमोल येडगे यांच्या आदेशानुसार, तसेच आरोग्य सभापती डॉ. सुनीता सोळुंके आणि वैद्यकीय अधिकारी डॉ. पारस मंडलेचा यांच्या मार्गदर्शनाखाली नागरिकांसाठी मार्गदर्शक सूचना पत्रक प्रसिद्ध करण्यात आले आहे.

🟢 उष्मा लाटेपासून बचावासाठी काय करावे?

तहान नसली तरी दर अर्ध्या तासाने पाणी प्या

घराबाहेर पडताना टोपी, छत्री किंवा ओला कापड वापरा

दुपारी १२ ते ३ दरम्यान बाहेर जाणे टाळा

हलकी, सच्छिद्र सुती कपडे परिधान करा

प्रवासात नेहमी पिण्याचे पाणी सोबत ठेवा

ORS, लिंबूपाणी, ताक, लस्सी, कैरीचे पन्हे यांचा नियमित वापर करा

घर थंड ठेवण्यासाठी पडदे, झडपा व सनशेडचा वापर करा

कामाच्या ठिकाणी थंड पिण्याच्या पाण्याची व्यवस्था ठेवा

उन्हात काम करताना मध्ये-मध्ये विश्रांती घ्या

गरोदर महिला व आजारी व्यक्तींची विशेष काळजी घ्या

⚠️ उष्माघाताची लक्षणे ओळखा

अशक्तपणा

डोकेदुखी

चक्कर येणे

सतत घाम येणे

अशी लक्षणे जाणवल्यास त्वरित डॉक्टरांचा सल्ला घ्यावा.

🔴 काय करू नये?

उन्हात अति श्रमाची कामे करू नयेत

दारू, चहा, कॉफी व कार्बोनेटेड पेये टाळावीत

जड, गडद व घट्ट कपडे घालू नयेत

शिळे व जास्त प्रथिनयुक्त अन्न टाळावे

लहान मुले व पाळीव प्राणी बंद वाहनात ठेवू नयेत

तापमान जास्त असताना बाहेरील काम टाळावे

नागरिकांनी हवामान विभाग, रेडिओ, टीव्ही व अधिकृत संकेतस्थळांवरील सूचना नियमितपणे पाहाव्यात, असेही आवाहन करण्यात आले आहे.

✍️ उन्हाचा तडाखा वाढतोय... सावध रहा, सुरक्षित रहा!