जांभाळा जिल्हा परिषद शाळेतील चिमुकल्यांची गणितात गरुडझेप! दुसरीच्या विद्यार्थ्यांना ३० ते ४० पर्यंतचे पाढे मुखोद्गत

जांभाळा दि २९ :- गणित म्हटले की अनेक विद्यार्थ्यांच्या मनात भीती निर्माण होते. मात्र, योग्य मार्गदर्शन, नियमित सराव आणि शिक्षकांचे प्रभावी अध्यापन यांच्या बळावर लहान वयातही मोठी शैक्षणिक कामगिरी करता येते, हे जांभाळा येथील जिल्हा परिषद प्राथमिक शाळेतील इयत्ता दुसरीच्या विद्यार्थ्यांनी सिद्ध करून दाखवले आहे. या चिमुकल्या विद्यार्थ्यांनी ३० ते ४० पर्यंतचे पाढे आत्मसात करत गणित विषयात उल्लेखनीय प्रगती साधली आहे.

इयत्ता दुसरीतील विद्यार्थ्यांना एवढ्या मोठ्या संख्येपर्यंतचे पाढे शिकवणे, त्यांचा नियमित सराव करून घेणे आणि गणिताविषयी आवड निर्माण करणे, हे आव्हानात्मक काम आहे. वर्गशिक्षिका गीतांजली साळुंके यांनी नियोजनबद्ध अध्यापन, सातत्यपूर्ण उजळणी आणि विद्यार्थ्यांच्या क्षमतेवर विश्वास ठेवून केलेल्या प्रयत्नांमुळे ही कामगिरी साध्य झाली आहे.

विद्यार्थ्यांची गणितीय क्षमता वाढवण्यासाठी शाळेत पाढ्यांची परीक्षा, नियमित उजळणी आणि सरावावर विशेष भर दिला जात आहे. या उपक्रमामुळे विद्यार्थ्यांची स्मरणशक्ती, एकाग्रता, गणितातील अचूकता आणि आत्मविश्वास वाढण्यास मदत होत आहे. लहान वयातच गणिताचा भक्कम पाया तयार करण्याच्या दृष्टीने हा उपक्रम महत्त्वपूर्ण ठरत आहे.

मराठी शाळांच्या गुणवत्तेचे ठळक दर्शन

‘शाळा मराठी, आमची शाळा मराठी!’ या भावनेला बळ देणारी विद्यार्थ्यांची ही कामगिरी मराठी माध्यमाच्या जिल्हा परिषद शाळांमधील गुणवत्तापूर्ण शिक्षणाचे महत्त्व अधोरेखित करते. योग्य शैक्षणिक वातावरण, प्रभावी अध्यापन आणि शिक्षकांची मेहनत यांच्या जोरावर मराठी शाळांमधील विद्यार्थीही उल्लेखनीय यश संपादन करू शकतात, याची प्रचिती जांभाळा येथील विद्यार्थ्यांनी दिली आहे.

या उपक्रमासाठी वर्गशिक्षिका गीतांजली साळुंके यांना शाळेचे मुख्याध्यापक सोमनाथ भाकरे यांच्यासह सर्व शिक्षकांचे मोलाचे सहकार्य लाभत आहे. विद्यार्थ्यांच्या या शैक्षणिक प्रगतीचे परिसरातून कौतुक होत असून, शिक्षकांच्या प्रयत्नांमुळे चिमुकल्यांमध्ये गणिताविषयी आत्मविश्वास आणि शिकण्याची गोडी निर्माण होत आहे.

महाराष्ट्र वाणी | सत्यासाठी निर्भीड, जनतेसाठी समर्पित