हडको टीव्ही सेंटरमध्ये बॅनर-पोस्टरवाल्यांना दणका; महापालिकेची धडक कारवाई, दीड लाखांचा दंड वसूल

महाराष्ट्र वाणी

छत्रपती संभाजीनगर (औरंगाबाद) : शहरातील सार्वजनिक ठिकाणांचे विद्रुपीकरण करणाऱ्या अनधिकृत बॅनर, पोस्टर, माहिती फलक, भिंतीपत्रके आणि इतर जाहिरात साहित्याविरोधात छत्रपती संभाजीनगर महानगरपालिकेने आक्रमक भूमिका घेतली आहे. मंगळवारी (दि. १८ ऑगस्ट) हडको टीव्ही सेंटर परिसरात महापालिकेच्या पथकांनी धडक मोहीम राबवित १०० हून अधिक आस्थापनांची तपासणी केली. यावेळी नियमांचे उल्लंघन करणाऱ्या २० व्यावसायिक आस्थापनांवर दंडात्मक कारवाई करण्यात आली असून, एकाच दिवसात दीड लाख रुपयांहून अधिक दंड वसूल करण्यात आला.

महानगरपालिका आयुक्त अमोल येडगे यांच्या मार्गदर्शनाखाली आणि उपायुक्त नंदकिशोर भोंबे यांच्या नियोजनानुसार ही विशेष मोहीम राबविण्यात आली. नागरिक मित्र पथक तसेच घनकचरा व्यवस्थापन विभागाच्या पथकांनी हडको टीव्ही सेंटर परिसरातील विविध व्यावसायिक भागांची पाहणी केली.

१०० हून अधिक आस्थापनांची तपासणी

हडको टीव्ही सेंटर हा शहरातील महत्त्वाचा व्यापारी परिसर असून येथे मोठ्या प्रमाणावर विविध व्यावसायिक आस्थापने आहेत. मोहिमेदरम्यान कोचिंग क्लासेस, हॉस्पिटल, हॉटेल, साडी-कापड दुकाने, खानावळी, शॉपिंग मॉल यासह विविध आस्थापनांची तपासणी करण्यात आली.

तपासणीदरम्यान अनधिकृत बॅनर, पोस्टर, माहिती फलक, भिंतीपत्रके, पाम्प्लेट तसेच इतर जाहिरात साहित्य आढळलेल्या २० आस्थापनांवर कारवाई करण्यात आली.

५ हजारांपासून ५० हजारांपर्यंत दंड

उल्लंघनाचे स्वरूप आणि प्रमाण लक्षात घेऊन संबंधित व्यावसायिकांवर ५ हजार रुपयांपासून ५० हजार रुपयांपर्यंत दंड आकारण्यात आला. या सर्व कारवायांमधून एकत्रितपणे १.५० लाख रुपयांपेक्षा अधिक दंडाची वसुली करण्यात आली.

महापालिकेच्या अचानक झालेल्या या कारवाईमुळे परिसरातील व्यावसायिकांमध्ये खळबळ उडाली आहे. जाहिरातीसाठी बॅनर, पोस्टर किंवा इतर साहित्य लावताना महापालिकेची परवानगी आणि संबंधित नियमांचे पालन करणे आवश्यक असल्याचे प्रशासनाने स्पष्ट केले आहे.

आता शहरभर धडक मोहीम

हडको टीव्ही सेंटरमधील कारवाई ही केवळ एकदिवसीय मोहीम नसून, शहरातील अनधिकृत बॅनर-पोस्टरविरोधात व्यापक कारवाईची सुरुवात असल्याचे महापालिका प्रशासनाने स्पष्ट केले आहे.

शहरातील प्रमुख रस्ते, चौक, बाजारपेठा, व्यावसायिक परिसर आणि सार्वजनिक ठिकाणी अनधिकृतपणे लावण्यात आलेले बॅनर, पोस्टर आणि जाहिरात फलक तपासून संबंधितांवर दंडात्मक कारवाई करण्यात येणार आहे.

कचरा टाकणाऱ्यांवरही कारवाईचा इशारा

दरम्यान, शहराच्या स्वच्छतेला बाधा आणणाऱ्या व्यक्ती आणि आस्थापनांवरही कठोर कारवाई करण्याचा इशारा महापालिकेने दिला आहे. रस्त्यावर किंवा सार्वजनिक ठिकाणी कचरा टाकताना आढळल्यास दंड आकारण्यात येणार असून, गंभीर किंवा वारंवार होणाऱ्या उल्लंघनाच्या प्रकरणांत आवश्यकतेनुसार कायदेशीर कारवाई आणि गुन्हा दाखल करण्याची कार्यवाही केली जाणार आहे.

आयुक्त अमोल येडगे यांचे आवाहन

महापालिका आयुक्त अमोल येडगे यांनी सांगितले की, शहरातील महत्त्वाच्या ठिकाणी अनधिकृत बॅनर, पोस्टर आणि जाहिरात साहित्य लावल्यामुळे शहराचे विद्रुपीकरण होत आहे. सार्वजनिक ठिकाणांचे सौंदर्य आणि स्वच्छता कायम ठेवण्यासाठी विशेष मोहीम सुरू करण्यात आली असून, हडको टीव्ही सेंटरनंतर शहरातील इतर भागांतही नियमित तपासणी आणि दंडात्मक कारवाई केली जाणार आहे.

नागरिक आणि व्यावसायिकांनी जाहिरातीसाठी बॅनर, पोस्टर किंवा इतर साहित्य लावताना महापालिकेच्या नियमांचे पालन करावे आणि शहर स्वच्छ व सुंदर ठेवण्यासाठी प्रशासनाला सहकार्य करावे, असे आवाहनही त्यांनी केले.

महापालिकेच्या या धडक मोहिमेमुळे शहरातील सार्वजनिक जागांवर बेकायदेशीर जाहिरातबाजीला आळा बसण्याची अपेक्षा असून, ‘स्वच्छ, सुंदर आणि शिस्तबद्ध छत्रपती संभाजीनगर’च्या दिशेने हे महत्त्वाचे पाऊल मानले जात आहे.