गावाच्या मुलीचं थोर यश! टाकळी (रा.रा) येथील बुशरा पटेलची महावितरणमध्ये विद्युत सहाय्यकपदी निवड

महाराष्ट्र वाणी न्युज 

खुलताबाद दि १ ऑगस्ट :- तालुक्यातील टाकळी (रा.रा) सारख्या ग्रामीण आणि मर्यादित शैक्षणिक साधनांच्या क्षेत्रातूनही मोठं यश मिळवता येतं, हे पुन्हा एकदा सिद्ध केलं आहे कु. बुशरा मुनाफ पटेल हिने. महाराष्ट्र राज्य वीज वितरण कंपनीत (महावितरण) विद्युत सहाय्यक (Electrical Assistant) पदावर नुकतीच तिची निवड झाली आहे.

विशेष म्हणजे, बुशराने कोणतेही खासगी क्लासेस न लावता, केवळ स्वतःच्या जिद्दीच्या आणि चिकाटीच्या जोरावर हे यश मिळवलं आहे. ग्रामीण भागातील मुलींनाही मोठ्या संधी मिळू शकतात, हे तिच्या यशामुळे अधोरेखित झालं आहे.

आज टाकळी (रा.रा) गावात तिचा सत्कार करण्यात आला. या कार्यक्रमात आमदार सतीश चव्हाण यांनी तिचा सन्मान करत तिला पुढील वाटचालीसाठी मनःपूर्वक शुभेच्छा दिल्या. त्यांनी आपल्या भाषणात म्हटलं की, “बुशराने ज्या प्रकारे स्व-अभ्यास करून हे यश मिळवलं आहे, ते खरंच कौतुकास्पद असून इतर तरुणींनी तिचा आदर्श घ्यावा.”

सत्कारप्रसंगी ग्रामपंचायतीचे सरपंच, सदस्य, सोसायटीचे पदाधिकारी तसेच गावातील नागरिक मोठ्या संख्येने उपस्थित होते. गावकऱ्यांमध्येही आनंदाचं आणि अभिमानाचं वातावरण होतं.

बुशराने आपल्या वक्तव्यात सांगितलं की, “शिकण्यासाठी सुविधा कमी असल्या तरी आत्मविश्वास आणि मेहनत असेल, तर कोणतीही गोष्ट अशक्य नाही. माझं हे यश मी माझ्या आई-वडिलांना आणि शिक्षकांना अर्पण करते.”

– जिथे इच्छाशक्ती तिथे यश हमखास! बुशराचं यश ग्रामीण भागातील युवक-युवतींसाठी दीपस्तंभ ठरणार!