महिला क्रिकेट विश्वविजयाचा वर्षा निवासस्थानी जल्लोष – मुख्यमंत्री फडणवीस आणि उपमुख्यमंत्री पवार यांचा विजेत्यांना सत्कार!

महाराष्ट्र वाणी न्युज 

वर्षा शासकीय निवासस्थान, मुंबई दि ७ :- आयसीसी महिला विश्वचषक २०२५ मध्ये इतिहास घडवून भारताला पहिल्यांदाच विश्वविजेतेपद मिळवून देणाऱ्या भारतीय महिला क्रिकेट संघाचा मुख्यमंत्री देवेंद्र फडणवीस यांनी सत्कार केला. संघातील सर्व खेळाडू, प्रशिक्षक आणि सहाय्यक कर्मचाऱ्यांचा या समारंभात गौरव करण्यात आला.

मुख्यमंत्री फडणवीस म्हणाले, “या विजयाने भारताचा क्रीडा इतिहास उज्ज्वल केला आहे. प्रत्येक खेळाडूने निर्णायक भूमिका बजावत भारताला विश्वविजेता बनवले. स्मृती मानधना, जेमिमाह रॉड्रिग्ज आणि राधा यादव या तिघींच्या खेळी तर भावी पिढीसाठी प्रेरणादायी ठरतील. प्रशिक्षक अमोल मुजुमदार यांची मेहनत आणि संघघटन कौशल्य अनुकरणीय आहे.”

या कार्यक्रमात स्मृती मानधना, जेमिमाह रॉड्रिग्ज आणि राधा यादव यांना प्रत्येकी ₹२ कोटी २५ लाख, प्रशिक्षक अमोल मुजुमदार यांना ₹२२ लाख ५० हजार, तर इतर सहकाऱ्यांना प्रत्येकी ₹११ लाख व सन्मानचिन्ह देऊन सत्कार करण्यात आला.

गोलंदाजी प्रशिक्षक आविष्कार साळवी, पद्मश्री डायना एडल्जी, ॲनालिस्ट अनिरुद्ध देशपांडे, लॉजिस्टिक सपोर्ट अपर्णा गंभीरराव, ऑपरेशन मॅनेजर मारुफ फजानदार, मिहिर उपाध्याय, पूर्वा काटे आणि ममता शिरसुल्ला यांचाही यावेळी गौरव करण्यात आला.

या सोहळ्याला उपमुख्यमंत्री अजित पवार, क्रीडा मंत्री ॲड. माणिकराव कोकाटे, सांस्कृतिक कार्य मंत्री ॲड. आशिष शेलार, प्रधान सचिव संजय खंदारे, आयुक्त शितल तेली आणि उपसचिव सुनील पांढरे उपस्थित होते.

उपमुख्यमंत्री अजित पवार म्हणाले, “हा क्षण महिला क्रिकेटसाठी ऐतिहासिक आहे. पद्मश्री डायना एडल्जी यांनी पेरलेले बीज आज मोठे वृक्ष झाले आहे. ग्रामीण भागातील मुलींनाही योग्य संधी मिळाल्यास त्या जागतिक पातळीवर यश मिळवू शकतात, हे या संघाने सिद्ध केले आहे. भविष्यातही अशाच कामगिरीची अपेक्षा आहे.”

✨ – महाराष्ट्र वाणी

"भारताच्या या विश्वविजयाने प्रत्येक मुलीच्या हातात नवा आत्मविश्वास दिला आहे!"