"५७ जागांवर कमळ फुललं; पण २३व्या महापौराची खुर्ची कुणाची? खुला प्रवर्ग असला तरी ‘रिमोट कंट्रोल’ ओबीसी नेत्यांच्या हाती"

महाराष्ट्र वाणी 

छत्रपती संभाजीनगर(औरंगाबाद) विशेष प्रतिनिधी

दिनांक २३ :- ‌छत्रपती संभाजीनगर महानगरपालिकेवर पहिल्यांदाच तब्बल ५७ जागांसह भाजपने स्पष्ट बहुमत मिळवत सत्ता काबीज केली आहे. कमळ फुलल्याने भाजप कार्यकर्त्यांमध्ये जल्लोषाचे वातावरण असले, तरी आता संपूर्ण शहराच्या नजरा लागल्या आहेत त्या महानगरपालिकेच्या २३व्या महापौराच्या खुर्चीकडे.

महापौर पदासाठी आरक्षण खुल्या प्रवर्गासाठी जाहीर झालं असलं, तरी प्रत्यक्षात शहराचा नवा कारभारी कोण असेल, याचा रिमोट कंट्रोल भाजपच्या वजनदार ओबीसी नेत्यांच्या हातात असल्याचं स्पष्ट होत आहे.

👥 महापौरपदासाठी ८ दिग्गज मैदानात

भाजपमध्ये सध्या महापौरपदासाठी एकापेक्षा एक ताकदवान आणि आक्रमक चेहरे रिंगणात उतरले आहेत.

यामध्ये प्रामुख्याने—

दोन वेळा नगरसेवक महेश माळवतकर

समीर राजूरकर

राजगौरव वानखेडे

शिवाजी दांडगे

रामेश्वर भादवे

विजय औताडे

सुरेंद्र कुलकर्णी

रेणुकादास वैद्य

या आठ जणांची नावे जोरदार चर्चेत आहेत. प्रत्येकाकडे अनुभव, संघटनात्मक ताकद आणि स्वतःचा गट असल्याने स्पर्धा कमालीची चुरशीची बनली आहे.

मात्र, भाजपच्या राजकारणात ‘धक्कातंत्र’ नवीन नाही. त्यामुळे सध्या चर्चेत नसलेलं एखादं नाव ऐनवेळी पुढे येऊन सर्वांनाच धक्का देण्याची शक्यता नाकारता येत नाही.

🎯 ओबीसी नेत्यांची ‘कोअर कमिटी’ ठरणार निर्णायक

यावेळच्या महापौर निवडीचं सर्वात महत्त्वाचं वैशिष्ट्य म्हणजे,

खुल्या प्रवर्गातून महापौर निवडायचा असला तरी अंतिम निर्णयात भाजपचे ओबीसी नेतेच कळीची भूमिका बजावणार आहेत.

यामध्ये—

बहुजन कल्याण मंत्री अतुल सावे

खासदार डॉ. भागवत कराड

आमदार संजय केणेकर

यांची कोअर कमिटी नावावर शिक्कामोर्तब करणार असल्याची चर्चा आहे.

जर या तिन्ही नेत्यांमध्ये शहरपातळीवर एकमत झाले नाही, तर अंतिम फैसला थेट मुख्यमंत्री देवेंद्र फडणवीस घेणार, हेही जवळपास निश्चित मानलं जात आहे.

🤔 ओबीसी समाजाला धक्का देणारी ‘सरप्राईज एंट्री’ होणार का?

पक्षात अशीही जोरदार चर्चा आहे की, आगामी निवडणुका डोळ्यासमोर ठेवून ओबीसी समाजाला मोठं प्रतिनिधित्व देण्यासाठी

भाजप हाय कमांड—

अनिल मकरिये

प्रा. गोविंद केंद्रे

किंवा बालाजी मुंडे

यांच्यापैकी कुणाला संधी देऊन सर्वांनाच थक्क करणार का?

हा प्रश्न सध्या राजकीय वर्तुळात रंगला आहे.

⏳ अनुभव की तरुणाई? उत्सुकता शिगेला

शहराच्या विकासाचा केंद्रबिंदू ठरवून भाजप हाय कमांड अनुभवी, जुना जाणता चेहरा निवडते की नव्या जोशाच्या तरुण रक्ताला संधी देते, याकडे सर्वांचे लक्ष लागले आहे.

महापौरपदाच्या या शर्यतीत कोणाच्या गळ्यात विजयाची माळ पडणार, हे पाहणं आता छत्रपती संभाजीनगरच्या राजकारणात सर्वात रंजक ठरणार आहे.

👉 महापौरपदाच्या या थरारक शर्यतीत अखेर कोण बाजी मारतो, यासाठी वाचा — तुमचं विश्वासार्ह न्यूज पोर्टल!