शेतकऱ्यांच्या लढ्यात राष्ट्रवादी काँग्रेस (शरद पवार पक्ष) शेतकऱ्यांच्या पाठीशी — पांडुरंग तांगडे पाटील यांनी मंगेश साबळे यांच्या आमरण उपोषणाला दिला पाठिंबा

महाराष्ट्र वाणी न्युज 

सिल्लोड दि ५ :- ओल्या दुष्काळामुळे हवालदिल झालेल्या शेतकऱ्यांच्या न्याय्य मागण्यांकडे प्रशासनाचे लक्ष वेधण्यासाठी सिल्लोड तालुक्यातील शेतकरीपुत्र श्री. मंगेश साबळे यांनी गेल्या सात दिवसांपासून तहसील कार्यालयासमोर आमरण उपोषण सुरू केले आहे. या उपोषणकर्त्या शेतकऱ्याला आज राष्ट्रवादी काँग्रेस शरद पवार पक्षाचे जिल्हाध्यक्ष पांडुरंग तांगडे पाटील यांनी भेट देऊन त्यांच्या लढ्याला समर्थन जाहीर केले.

तांगडे पाटील यांनी प्रशासनास उद्देशून सांगितले की, "शेतकऱ्यांच्या या आंदोलनाची दखल प्रशासनाने तत्काळ घ्यावी. ओला दुष्काळ जाहीर करून शेतकऱ्यांना त्वरित आर्थिक मदत मिळाली पाहिजे. हा लढा शेतकऱ्यांच्या अस्तित्वाचा आहे आणि आम्ही पूर्णपणे त्यांच्या पाठीशी आहोत."

या भेटीदरम्यान राष्ट्रवादी काँग्रेसचे तालुकाध्यक्ष राहुलकुमार ताठे, अल्पसंख्याक जिल्हाध्यक्ष शेख शफीक तसेच पक्षाचे पदाधिकारी, कार्यकर्ते आणि शेतकरी बांधव मोठ्या संख्येने उपस्थित होते. उपोषणस्थळी वातावरण तणावपूर्ण असले तरी शेतकऱ्यांचा निर्धार दृढ असून, जोपर्यंत सरकार ठोस निर्णय घेत नाही तोपर्यंत आंदोलन सुरू ठेवण्याचा इशारा त्यांनी दिला आहे.

🔹 महाराष्ट्र वाणी — शेतकऱ्यांच्या हक्कासाठी सदैव आवाज उठवणारे!