🌳‘५० लाख वृक्षांचे स्वप्न साकार!’ – जनसहयोग संस्थेची १५० प्रजातींसह भव्य हरित मोहीम

महाराष्ट्र वाणी 

छत्रपती संभाजीनगर(औरंगाबाद) दि २२ :- वाढत्या उष्णतेच्या पार्श्वभूमीवर पर्यावरण संवर्धनासाठी जनसहयोग संस्थेने पुन्हा एकदा कंबर कसली आहे. यंदा पहिल्या टप्प्यात तब्बल पाच लाख रोपे तयार करून १५० विविध वृक्षप्रजातींची लागवड करण्याचे उद्दिष्ट संस्थेने निश्चित केले आहे. संस्थेचे प्रतिनिधी प्रशांत गिरे यांनी याबाबत माहिती दिली.

गेल्या दशकभरात संस्थेने देशी, दुर्मिळ आणि औषधी वनस्पतींच्या संवर्धनासाठी सातत्याने काम केले आहे. फक्त रोपे लावण्यापुरते मर्यादित न राहता, संपूर्ण वनक्षेत्र विकसित करण्यावर संस्थेचा भर आहे.

अनेक दुर्मिळ प्रजाती सहज उपलब्ध होत नसल्यामुळे मागील काही वर्षांपासून संस्थेने स्वतःची रोपवाटिका उभारली आहे. कमी वेळेत अधिक रोपे तयार करण्यासाठी विविध प्रयोग यशस्वीपणे राबवले गेले आहेत. विशेषतः मातीसोबत लाकडाचा भुसा वापरल्यामुळे जमिनीतील आर्द्रता टिकून राहते आणि बियांची उगवण जलद होते.

या प्रयत्नांमुळे सोनसावर, वारंग, मोखा आणि गुलाबी पाडळ यांसारख्या दुर्मिळ वृक्षप्रजातींची वाढ मोठ्या प्रमाणावर झाली आहे. आगामी अक्षय तृतीयाच्या मुहूर्तावर बीज लागवड करून रोपवाटिका विस्तारण्याचे काम सुरू झाले आहे.

या उपक्रमात संदीप जगधने, कैलास खांड्रे, मिलिंद गिरिधारी, रशीद भाई, शाम अण्णा जेपल्लिकर, अमोल मोरे, जितेश सुरवाडे, संतोष दंडिमे, आबासाहेब सुरासे, मंगेश सांगळे आणि नंदन जाधव हे कार्यकर्ते उन्हातान्हात बिया संकलनासाठी रानावनात फिरत आहेत.

प्रकल्पाच्या शुभारंभावेळी आमदार श्रीकांत भारतीय, महापौर समीर राजूरकर, मनपा आयुक्त अमोल येडगे तसेच ग्राईंड मास्टर कंपनीचे व्यवस्थापकीय संचालक मिलिंद केळकर उपस्थित होते.

या उपक्रमासाठी देवराई फाउंडेशनमार्फत धनंजय शेडबाळे आणि रघुनाथ ढोले यांनी लागवडीसाठी आवश्यक पिशव्यांचे योगदान दिले आहे. सध्या या पिशव्यांमध्ये माती भरण्याचे काम पूर्ण झाले असून लवकरच रोपे तयार होणार आहेत.

हरित महाराष्ट्राच्या दिशेने जनसहयोग संस्थेचा हा उपक्रम एक महत्त्वाचा टप्पा ठरत आहे.

“आजची ही रोपे, उद्याच्या पिढीसाठी हिरव्या आशेची सावली ठरणार आहेत!” 🌱