सेवा हीच ईश्वरसेवा – रामदास वाघमारे दांपत्यांची माणुसकी जपणारी माई कथा”

महाराष्ट्र वाणी न्युज 

छत्रपती संभाजीनगर (औरंगाबाद) दि २० :– आजच्या यांत्रिक आणि स्वार्थी होत चाललेल्या जीवनात वृद्ध आई-वडील अनेकदा एकटेपणाला आणि जगण्यासाठी झगडणाऱ्या परिस्थितीला सामोरे जातात. पण शहरातील माई वृद्धाश्रम या सेवाभावी संस्थेने अशा निराधार, अनाथ आणि बेघर मातांसाठी जीवनाचा नवा आशादायी मार्ग उभा केला आहे.

२०२० साली आदर्श शिक्षक रामदास वाघमारे आणि आदर्श शिक्षिका मीरा वाघमारे यांच्या सामाजिक बांधिलकीतून जन्माला आलेल्या या आश्रमाने आज अनेक वृद्ध मातांच्या आयुष्यात प्रेम, माया आणि जगण्याचा आत्मविश्वास पुनर्जिवित केला आहे.

चार मजली सेवाभावी कुटुंब

छत्रपती संभाजीनगरात उभ्या असलेल्या या आश्रमात २५ वृद्ध मातांसाठी निवासव्यवस्था आहे. ही इमारत फक्त आश्रय नाही, तर प्रेमाचं कुटुंब आहे. प्रत्येक मातेसाठी स्वतंत्र, सुरक्षित आणि सन्मानाने जगण्याची सुविधा येथे उपलब्ध आहे.

मानवीयतेने ओतप्रोत सुविधा

योग व ध्यान केंद्र – मातांच्या मानसिक व शारीरिक आरोग्यासाठी नियमित सत्रे

भजन-कीर्तन हॉल – अध्यात्मिक वातावरणातून मन:शांती

समृद्ध ग्रंथालय – २००० हून अधिक पुस्तकांचा खजिना

विस्तीर्ण स्वयंपाकघर – ५० लोकांसाठी भोजन व्यवस्था

मुल्याधारित उपक्रमांची परंपरा

आश्रमात रोजच्या दिनचर्येसोबतच सेवा-कार्यालाही तितकंच महत्त्व दिलं जातं.

नियमित आरोग्य तपासणी

सांस्कृतिक कार्यक्रम, सणांची एकत्र साजरी

‘एक हात मदतीचा’ उपक्रमातून अन्न-वस्त्र वाटप

गरजू विद्यार्थ्यांना शैक्षणिक साहित्याचे वितरण

‘सेवा हीच ईश्वरसेवा’ – विचारातून साकारलेलं जगणं

माई वृद्धाश्रमाचा मुख्य संदेश साधा पण प्रभावी आहे – आईला कधीही एकटं सोडू नका. निराधार मातांच्या डोळ्यात आसवांऐवजी आत्मविश्वास आणि हसू आणण्याची खरी कामगिरी हा आश्रम आज करत आहे.

लोकसहभागातून उभी राहते समाजसेवा

आश्रमाची नवी इमारत आता पूर्णत्वाच्या मार्गावर आहे. मात्र शेवटची काही कामं लोकसहभाग आणि दातृत्वाच्या मदतीने पूर्ण करण्याचे आवाहन वाघमारे दांपत्यांनी केले आहे.

माई वृद्धाश्रम – मायेचं घर, आधाराचा हात आणि जगण्याचा नवा उत्साह!

या पवित्र कार्याला समाजातील दानशूर व्यक्ती, संस्था आणि सेवाभावी मनांनी हातभार लावण्याचे आवाहन.