"सुईशिवाय इंजेक्शन! भारतात सुरू आरोग्यसेवेची नवी क्रांती"

महाराष्ट्र वाणी विशेष 

दि १४ :- Needle Free Injection : पारंपरिक सुईमुळे होणारी वेदना आणि भीती यावर अखेर आधुनिक तंत्रज्ञानाने उपाय शोधला आहे. IntegriMedical या भारतीय कंपनीने विकसित केलेली नीडल-फ्री इंजेक्शन सिस्टीम (N-FIS) आता आरोग्यसेवेत नवा बदल घडवत आहे. लसीकरण किंवा उपचारांसाठी सुईची भीती वाटणाऱ्या लहान मुलांसाठी तसेच प्रौढांसाठीही ही प्रणाली अत्यंत फायदेशीर ठरत आहे.

ही नवी प्रणाली सुई न वापरता, स्प्रिंग-चालित उच्च दाबाच्या मदतीने अगदी 1/10 सेकंदापेक्षा कमी वेळेत औषध त्वचेच्या आत पोहोचवते. त्यामुळे वेदना जाणवत नाहीत आणि रुग्णांचा अनुभव अधिक सुरक्षित व आरामदायी बनतो. बालरोग, स्त्रीरोग आणि IVF उपचारांमध्ये या तंत्रज्ञानाचा वापर मोठ्या प्रमाणावर केला जात आहे.

सर्वेश मुठा, अंकुर नाईक, स्कॉट मॅकफार्लंड आणि मार्क टीम यांनी स्थापन केलेल्या या कंपनीला CDSCO, CE आणि ISO 13485 यांसारखी महत्त्वपूर्ण आंतरराष्ट्रीय मान्यतापत्रे मिळाली आहेत.

सध्या देशभरातील 180 पेक्षा जास्त शहरांमध्ये 1000 हून अधिक तज्ज्ञ डॉक्टर N-FIS चा वापर करत आहेत. क्लाउडनाईन, KEM, अपोलो क्रॅडल, अस्टर यांसारखी नामांकित रुग्णालयेही या तंत्रज्ञानावर विश्वास ठेवत आहेत. विशेष म्हणजे, जगातील सर्वात मोठी लस उत्पादक कंपनी सीरम इन्स्टिट्यूट ऑफ इंडिया (SII) ने IntegriMedical मध्ये 20% गुंतवणूक करून या प्रकल्पाला मोठा पाठिंबा दिला आहे.

व्यवस्थापकीय संचालक सर्वेश मुठा यांच्या मते, “नीडल-फ्री प्रणालीमुळे रुग्णांची भीती कमी होत असून उपचार प्रक्रियेतील सातत्य वाढत आहे.” आजपर्यंत देशातील 25 राज्यांमध्ये 50,000 हून अधिक नीडल-फ्री इंजेक्शन्स देण्यात आल्याची माहिती त्यांनी दिली.