🩺 रसुलाबादच्या मातीतून उमटले यशाचे दोन दीप! दोन भावांनी पूर्ण केली डॉक्टर होण्याची स्वप्नपूर्ती

महाराष्ट्र वाणी न्युज 

बीड दि ११ :- जिल्ह्यातील गेवराई तालुक्यातील चकलांबा पोस्ट असलेले छोटेसे रसुलाबाद हे केवळ ६०० ते ७०० मतदार असलेले एक अतिशय साधं, ग्रामीण गाव. मात्र या छोट्या खेड्यातून दोन तरुणांनी आपल्या जिद्दीच्या जोरावर अशक्य वाटणारे स्वप्न साकार करून दाखवले आहे.

अशपाक नशिर शेख आणि आरिफ नशिर शेख हे दोघे भाऊ — या दोघांनी कठीण परिश्रम आणि सातत्यपूर्ण अभ्यासाच्या जोरावर NEET सारखी अत्यंत आव्हानात्मक परीक्षा ओपन वर्गातून उत्तीर्ण करत, वैद्यकीय शिक्षणासाठी शासकीय महाविद्यालयात प्रवेश मिळवला.

➡️ आरिफ नशिर शेख यांनी शासकीय वैद्यकीय महाविद्यालय, जळगाव येथे बीएएमएस (B.A.M.S.) चे शिक्षण यशस्वीरीत्या पूर्ण केले.

➡️ तर अशपाक नशिर शेख यांनी CSMSS, छत्रपती संभाजीनगर (औरंगाबाद) येथून बीएएमएस चे शिक्षण पूर्ण करून डॉक्टर होण्याचं आपलं स्वप्न साकार केलं.

दोघांचे वडील नशिर शेख हे साध्या शेतकरी कुटुंबातील असून, त्यांच्याच प्रेरणेने या दोघा मुलांनी आयुष्य बदलवून टाकलं आहे. गावातील ही पहिली पिढी डॉक्टर बनल्यामुळे केवळ कुटुंबाचंच नव्हे, तर संपूर्ण पंचक्रोशीत आनंदाचे वातावरण आहे.

नशिर शेख यांना तीन मुलगे आणि एक मुलगी आहे. मोठा मुलगा बँकेत नोकरीला असून, मुलगी शिक्षिका आहे. नशिर शेख यांनी आपल्या कुटुंबाला शिक्षणाचे महत्त्व दिले, आणि त्यांच्याच मार्गदर्शनामुळे दोन्ही मुलांनी परिस्थितीवर मात करत डॉक्टर बनून दाखवलं.

गावकऱ्यांनी दोघा भावांवर कौतुकाची थाप देत सांगितलं 

 “खेड्यातूनही मोठं स्वप्न बघता येतं आणि ते पूर्णही करता येतं, याचं जिवंत उदाहरण म्हणजे अशपाक आणि आरिफ!”

या दोघांच्या यशकथेमुळे आज रसुलाबाद गाव अभिमानाने उजळून निघालं आहे.

📚 शिक्षण, जिद्द आणि मेहनतीने बदलता येतो प्रत्येकाचा भाग्यलेख — हे सिद्ध केलं आहे रसुलाबादच्या या दोन भावांनी!