‘चारित्र्यसंपन्नतेतच शिक्षणाचं खरं यश’ – डॉ. अब्दुल करीम सालार! इक्रा एच. जे. थीम कॉलेजमध्ये निरोप समारंभ व वार्षिक स्नेहसंमेलन उत्साहात

महाराष्ट्र वाणी

जळगाव (प्रतिनिधी) दि. २५ :

इक्रा एज्युकेशन सोसायटी, जळगाव संचलित इक्रा एच. जे. थीम कॉलेज ऑफ आर्ट्स अँड सायन्स, मेहरुण येथे पदवी महाविद्यालयाच्या विद्यार्थ्यांसाठी निरोप समारंभ व वार्षिक पारितोषिक वितरण सोहळा उत्साहात पार पडला. या कार्यक्रमाच्या अध्यक्षस्थानी सोसायटीचे अध्यक्ष तथा ज्येष्ठ शिक्षणतज्ज्ञ डॉ. अब्दुल करीम सालार होते.

कार्यक्रमाची सुरुवात डॉ. अख्तर शाह यांच्या कुराण पठणाने झाली. प्रभारी प्राचार्य डॉ. वकार शेख यांनी स्वागतपर भाषण करत महाविद्यालयाच्या शैक्षणिक व सांस्कृतिक प्रगतीचा आढावा घेतला आणि विद्यार्थ्यांच्या यशाचे कौतुक केले.

यावेळी विद्यार्थी-विद्यार्थिनींनी आपल्या भावना व्यक्त करत महाविद्यालयाशी असलेले नाते आणि शिक्षकांकडून मिळालेल्या मार्गदर्शनाबद्दल कृतज्ञता व्यक्त केली. प्रा. डॉ. युसूफ पटेल व प्रा. डॉ. फिरदौस यांनी विद्यार्थ्यांना भविष्यातील आव्हानांसाठी सज्ज राहण्याचे मार्गदर्शन केले.

प्रमुख पाहुणे म्हणून उपस्थित असलेले नितिन गणापुरे (SDPO) यांनी आपल्या ओघवत्या भाषणातून विद्यार्थ्यांना प्रेरित केले. तसेच अब्दुल रशीद शेख, एजाज मलिक, प्रा. जफर शेख, अब्दुल मजीद सेठ आणि अब्दुल अजीज सालार यांनीही मनोगत व्यक्त करत कठोर परिश्रम आणि चिकाटीचा मंत्र दिला.

अध्यक्षीय भाषणात डॉ. अब्दुल करीम सालार म्हणाले की, “शिक्षणाचा खरा उद्देश केवळ पदवी मिळवणे नसून चारित्र्य घडवणे हा आहे. ज्ञानाचे प्रतिबिंब व्यक्तीच्या वर्तनात आणि नैतिकतेत दिसले, तरच ते खरे शिक्षण ठरते.” त्यांनी विद्यार्थ्यांना उज्ज्वल भविष्यासाठी शुभेच्छा दिल्या.

पारितोषिक वितरण सोहळ्यात विविध क्षेत्रांत उत्कृष्ट कामगिरी करणाऱ्या विद्यार्थ्यांना सुवर्णपदक व पुरस्कार देऊन सन्मानित करण्यात आले. यंदाचा ‘बेस्ट स्टुडंट’ पुरस्कार सायम शेख याला प्रदान करण्यात आला.

कार्यक्रमाच्या यशस्वी आयोजनासाठी महाविद्यालयातील सर्व शिक्षक व शिक्षकेतर कर्मचाऱ्यांनी परिश्रम घेतले. शेवटी प्रा. डॉ. तनवीर खान यांनी उपस्थितांचे आभार मानून कार्यक्रमाची सांगता केली.

— शिक्षणातून घडलेलं चारित्र्यच आयुष्याला खरी दिशा देतं, हेच या सोहळ्याने पुन्हा अधोरेखित केलं.