उद्यानातील अपघात प्रकरण — जबाबदारांवर कठोर कारवाईसाठी उच्चस्तरीय चौकशी समितीची मागणी!

महाराष्ट्र वाणी न्युज 

मुंबई (प्रतिनिधी) दि१३ जून :- छत्रपती संभाजीनगर मनपाच्या सिद्धार्थ उद्यानातील मुख्य प्रवेशद्वार कोसळून दोन महिलांचा मृत्यू झालेल्या गंभीर घटनेवर पीपल्स फोरम फॉर सोशल कॉजचे सचिव डॉ. राजेंद्र दाते पाटील यांनी संतप्त प्रतिक्रिया दिली आहे. त्यांनी नगरविकासमंत्री तथा उपमुख्यमंत्री एकनाथ शिंदे यांच्याकडे या संपूर्ण प्रकरणाची उच्चस्तरीय चौकशी समिती नेमण्याची आणि दोषींवर गुन्हा दाखल करण्याची जोरदार मागणी केली आहे.

बुधवारी (११ जून २०२५) सायंकाळी साडेसहा वाजेच्या सुमारास शहरात वादळी वाऱ्यासह झालेल्या पावसात सिद्धार्थ उद्यानाचे सिमेंटचे मुख्य प्रवेशद्वार पर्यटकांवर कोसळले. या दुर्घटनेत स्वाती खैरनार (वय ३७) व रेखा गायकवाड (वय ६५) यांचा जागीच मृत्यू झाला, तर शेख अकील रहीम गंभीर जखमी असून, इतर ४ नागरिक किरकोळ जखमी झाले.

डॉ. दाते पाटील म्हणाले की, हे केवळ निसर्गाचे नव्हे, तर मनपाच्या निष्काळजी कारभाराचे परिणाम आहेत. त्यांनी पुढे सांगितले की —

संबंधित कंत्राटदार आणि

वास्तू पूर्णत्व प्रमाणपत्र (OC) देणारे अधिकारी,

तसेच बांधकाम परवानगी देणारे आणि देखरेख करणारे अभियंते,

हे सर्व या दुर्घटनेस थेट जबाबदार आहेत.

त्यांच्यावर गुन्हा दाखल करून तत्काळ निलंबनाची मागणी त्यांनी केली.

शिवाय, दुर्घटनाग्रस्त कुटुंबीयांना प्रत्येकी १० लाख रुपयांची आर्थिक मदत आणि कुटुंबातील एका सदस्याची शैक्षणिक पात्रतेनुसार थेट मनपा सेवेत भरती करावी, अशीही मागणी त्यांनी केली.

याचबरोबर, डॉ. दाते पाटील यांनी मनपाच्या प्राणी संग्रहालयात उच्चशिक्षित पशुवैद्यकीय अधिकाऱ्यांची नियुक्ती नाही, यावरही नाराजी व्यक्त केली. अनुभवी सर्जनची तात्काळ नियुक्ती व्हावी, अशीही विनंती त्यांनी केली.

"मनपाच्या ताब्यातील सर्व इमारतींचे स्ट्रक्चरल ऑडिट करा!"

– डॉ. दाते पाटील यांनी स्पष्ट सुचवले की अशा दुर्घटना टाळण्यासाठी सर्व मनपा इमारतींचे स्ट्रक्चरल ऑडिट अनिवार्य करावे.

ही घटना केवळ अपघात नसून शासनव्यवस्थेतील त्रुटींचा आणि बेपर्वाईचा परिणाम आहे. त्यामुळे या घटनेतील जबाबदारांवर कठोर कारवाई करूनच मृतांना खरी

श्रद्धांजली ठरेल.