अझर पठाण यांचे मुख्यमंत्र्यांना पत्र : ‘अल्पसंख्याक हक्क दिन भव्य पद्धतीने साजरा करा, माहितीपुस्तिका प्रकाशित करा’

महाराष्ट्र वाणी 

छत्रपती संभाजीनगर(औरंगाबाद) दि १९ :- वेलकम शैक्षणिक सामाजिक व सांस्कृतिक संस्थेचे सचिव अझर पठाण यांनी मुख्यमंत्री देवेंद्र फडणवीस, अल्पसंख्याक विकास मंत्री माणिकराव कोकाटे तसेच अल्पसंख्याक आयोग आणि संबंधित अधिकाऱ्यांना निवेदन देत १८ डिसेंबर ‘अल्पसंख्याक हक्क दिन’ राज्यभर अधिक प्रभावी आणि भव्य पद्धतीने आयोजित करण्याची मागणी केली आहे.

निवेदनात त्यांनी म्हटले आहे की, हा दिवस केवळ औपचारिक राहू नये, तर राज्यातील प्रत्येक विद्यापीठ, महाविद्यालय, शाळा आणि सर्व जिल्ह्यांत व्याख्यानमाला, चर्चासत्र आणि जनजागृती कार्यक्रम भरवून अल्पसंख्याक समाजातील नागरिकांना त्यांच्या घटनात्मक व कायदेशीर हक्कांची माहिती व्यापक स्वरूपात मिळावी.

अझर पठाण यांनी मांडलेल्या प्रमुख मागण्या –

१) राज्यभर प्रभावी कार्यक्रमांचे आयोजन :

१८ डिसेंबर हक्क दिनाच्या निमित्ताने आयोजित कार्यक्रमांची प्रभावी अंमलबजावणी व्हावी, आणि ते सर्व शिक्षणसंस्थांमध्ये सक्रियपणे पार पडावेत, अशी मागणी करण्यात आली आहे.

२) माहितीपुस्तिका प्रकाशित करावी :

अल्पसंख्याक विकास विभागाकडून राबविण्यात येणाऱ्या सर्व योजनांची सविस्तर, सोपी आणि एकत्रित माहिती असलेली ‘माहितीपुस्तिका’ प्रकाशित करून तिचे राज्यभर वितरण करण्याची मागणीही त्यांनी केली आहे.

ही पुस्तिका १८ डिसेंबरच्या कार्यक्रमांबरोबरच वर्षभर नागरिकांना उपलब्ध व्हावी, जेणेकरून लाभार्थ्यांना योजनांचा योग्य लाभ घेता येईल.

अझर पठाण यांनी दिलेल्या निवेदनातून अल्पसंख्याक समाजातील हक्कजागृती आणि शासकीय योजनांची पारदर्शक माहिती नागरिकांपर्यंत पोहोचवण्यावर भर देण्यात आला आहे.