अंभई ग्रामपंचायतीत संविधान दिन उत्साहात साजरा; उद्देशिकेचे वाचन व ग्रामसभेला नागरिकांचा उत्स्फूर्त प्रतिसाद

महाराष्ट्र वाणी 

अंभई, सिल्लोड दि २६ :- सिल्लोड तालुक्यातील अंभई ग्रामपंचायत कार्यालयात आज दिनांक २६ नोव्हेंबर रोजी संविधान दिन मोठ्या उत्साहात साजरा करण्यात आला. भारताचे संविधान स्वीकारल्याच्या स्मरणार्थ दरवर्षी हा दिवस विशेष उपक्रमांनी साजरा करण्यात येतो. त्यानुसार अंभई ग्रामपंचायतीतही विविध कार्यक्रमांचे आयोजन करण्यात आले.

कार्यक्रमाची सुरुवात संविधानाच्या उद्देशिकेचे सामूहिक वाचन करून करण्यात आली. सर्व ग्रामपंचायत पदाधिकारी, कर्मचारी, सदस्य तसेच उपस्थित नागरिकांनी उद्देशिकेतील मूल्यांना अनुसरून कार्य करण्याची शपथ घेतली. सामूहिक वाचनादरम्यान संविधानातील समानता, बंधुता, न्याय व स्वातंत्र्य या मुल्यांचे महत्व उपस्थितांना पटवून देण्यात आले.

यानंतर नियमित ग्रामसभा घेण्यात आली. ग्रामसभेत विविध विकासकामांचा आढावा घेण्यासोबतच नागरिकांकडून मिळालेल्या सूचना, अडचणी व अपेक्षा यावर खुली चर्चा करण्यात आली. गावाच्या प्रगतीसाठी सर्वांनी एकत्रितपणे योगदान देण्याचे आवाहन सरपंचांनी यावेळी केले.

या कार्यक्रमाला सरपंच, ग्रामपंचायत अधिकारी, सर्व सदस्य, कर्मचारी व नागरिक मोठ्या संख्येने उपस्थित होते. संविधान दिनानिमित्त झालेल्या कार्यक्रमामुळे गावात जनजागृती व लोकतांत्रिक मूल्यांची जपणूक करण्याचा संदेश देण्यात आला.