"शिंदेंचा मास्टरस्ट्रोक! सईद खान यांना विधान परिषदेची उमेदवारी"

महाराष्ट्र वाणी

परभणी (प्रतिनिधी) दि १ जून :- परभणी-हिंगोली स्थानिक स्वराज्य संस्था मतदारसंघाच्या विधान परिषद निवडणुकीसाठी उपमुख्यमंत्री एकनाथ शिंदे यांनी महत्त्वाचा राजकीय निर्णय घेत अल्पसंख्याक समाजातील युवा नेतृत्व सईद खान यांना उमेदवारी जाहीर केली आहे. या निर्णयामुळे मराठवाड्यातील राजकीय वर्तुळात चर्चांना उधाण आले असून स्थानिक पातळीवरील समीकरणे बदलण्याची शक्यता व्यक्त केली जात आहे.

सईद खान हे सध्या शिवसेना अल्पसंख्याक आघाडीचे प्रदेशाध्यक्ष म्हणून कार्यरत आहेत. पक्ष संघटन वाढविण्यासाठी त्यांनी राज्यभर सक्रिय भूमिका बजावली असून खासदार डॉ. श्रीकांत शिंदे यांच्या निकटवर्तीयांपैकी एक म्हणून त्यांची ओळख आहे.

राजकीय निरीक्षकांच्या मते, या उमेदवारीद्वारे महायुतीने अल्पसंख्याक समाजापर्यंत पोहोचण्याचा प्रयत्न केला आहे. आगामी स्थानिक स्वराज्य संस्था निवडणुकांच्या पार्श्वभूमीवर हा निर्णय महत्त्वाचा मानला जात आहे.

कोण आहेत सईद खान?

सईद खान हे गेल्या अनेक वर्षांपासून एकनाथ शिंदे यांच्यासोबत कार्यरत आहेत. जुलै 2023 मध्ये त्यांच्याकडे शिवसेना अल्पसंख्याक आघाडीच्या प्रदेशाध्यक्षपदाची जबाबदारी सोपवण्यात आली. त्यानंतर त्यांनी राज्यभर विविध संघटनात्मक उपक्रम राबवत पक्षाची ताकद वाढविण्याचे काम केले.

त्यांच्या नेतृत्वाखाली राज्यातील विविध स्थानिक स्वराज्य संस्थांमधील अनेक अल्पसंख्याक लोकप्रतिनिधींनी शिवसेनेत प्रवेश केला. त्यामुळे पक्षाच्या विस्तारात त्यांचे योगदान महत्त्वाचे मानले जाते.

निवडणुकीतील कामगिरी

2024 च्या विधानसभा निवडणुकीत सईद खान यांनी प्रभावी कामगिरी करत मोठ्या प्रमाणावर मते मिळवली होती. पाथरी परिसरात त्यांनी विविध विकासकामे आणि संघटनात्मक उपक्रमांच्या माध्यमातून आपला प्रभाव निर्माण केला. नगरपरिषद, जिल्हा परिषद, पंचायत समिती तसेच कृषी उत्पन्न बाजार समितीच्या निवडणुकांमध्येही त्यांच्या नेतृत्वाखाली पक्षाला यश मिळाले.

याच राजकीय आणि संघटनात्मक कामगिरीची दखल घेत पक्ष नेतृत्वाने त्यांच्यावर विधान परिषदेच्या निवडणुकीत मोठी जबाबदारी सोपवली आहे.

निर्णयाचे स्वागत

सईद खान यांच्या उमेदवारीचे अल्पसंख्याक समाजासह शिवसैनिकांमध्ये स्वागत होत असल्याचे दिसून येत आहे. त्यांच्या उमेदवारीमुळे परभणी-हिंगोली मतदारसंघातील निवडणूक अधिक रंगतदार होण्याची शक्यता असून महायुती आणि महाविकास आघाडी यांच्यात चुरशीची लढत पाहायला मिळू शकते.

वाचत रहा महाराष्ट्र वाणी – आपल्या भागातील राजकारण, घडामोडी आणि ताज्या बातम्यांसाठी!