🩸 “माणुसकीचा उत्सव” : रक्तदान शिबीर, सेवा गौरव सोहळा आणि प्रेरणादायी कार्यक्रमांचा संगम!

महाराष्ट्र वाणी

छत्रपती संभाजीनगर(औरंगाबाद) दि ३० :- महाराष्ट्रात सामाजिक कार्यासाठी ओळख असलेल्या सु-लक्ष्मी बहुद्देशीय सेवाभावी संस्था आणि माणुसकी वृद्ध सेवालय यांच्या संयुक्त विद्यमाने माणुसकी समूहाचा नववा वर्धापन दिन ३१ मार्च २०२६ रोजी मोठ्या उत्साहात साजरा केला जाणार आहे. यानिमित्त भव्य रक्तदान शिबीर, सेवा गौरव पुरस्कार वितरण सोहळा आणि विविध प्रेरणादायी कार्यक्रमांचे आयोजन करण्यात आले आहे.

या कार्यक्रमाचे खास आकर्षण म्हणजे सप्तखंजेरी वादक सत्यपाल महाराजांचे शिष्य पंकजपाल राठोड महाराज यांचे ‘माणुसकी’ या विषयावर व्याख्यान होणार असून, ज्युनिअर चार्ली म्हणून ओळखले जाणारे सोमनाथ स्वभावने हे आपल्या मुख अभिनयातून उपस्थितांना खळखळून हसवणार आहेत.

या वर्धापन दिनानिमित्त विविध क्षेत्रात उल्लेखनीय कार्य करणाऱ्या ५१ मान्यवरांना ‘सेवा गौरव पुरस्कार’ देऊन सन्मानित करण्यात येणार आहे. या सोहळ्यास राजेंद्र हिवाळे (प्रकल्प अधिकारी, आदिवासी विकास विभाग ठाणे), रविंद्र जोगदंड (उपमुख्य कार्यकारी अधिकारी, संभाजीनगर), संजय सोनायब (तहसीलदार, गेवराई), आप्पासाहेब उगले (परियोजना संचालक), पंकजपाल राठोड महाराज, मुकुंद सोनवणे (सामाजिक अभ्यासक), तसेच पोलीस विभागातील वरिष्ठ अधिकारी आणि विविध क्षेत्रातील मान्यवर उपस्थित राहणार आहेत.

हा कार्यक्रम मौलाना आझाद संशोधन केंद्र, टीव्ही सेंटर, संभाजीनगर येथे पार पडणार असून सकाळी ११:३० ते दुपारी २:०० या वेळेत रक्तदान शिबिर होईल. त्यानंतर दुपारी २:०० वाजता मान्यवरांच्या हस्ते सेवा गौरव पुरस्कार वितरण सोहळ्याला सुरुवात होणार आहे.

यासोबतच माणुसकी समूहाच्या वतीने शासकीय रुग्णालयात गरजू रुग्णांना अन्नदान करण्यात येणार आहे. अधिकाधिक नागरिकांनी रक्तदान करून या सामाजिक उपक्रमात सहभागी व्हावे, असे आवाहन समाजसेवक सुमित पंडित यांनी केले आहे.

 “रक्तदान म्हणजे जीवनदान… चला, माणुसकीच्या या उत्सवात सहभागी होऊन समाजसेवेचा हात मजबूत करूया!”