💔 भरदिवसा प्रेमाचा अंत! पेट्रोल पंपावर प्रियसीचा निर्घृण खून; आरोपी दोन तासांत जेरबंद

Apr 10, 2026 - 00:29

💔 भरदिवसा प्रेमाचा अंत! पेट्रोल पंपावर प्रियसीचा निर्घृण खून; आरोपी दोन तासांत जेरबंद

महाराष्ट्र वाणी

करमाड, दि. ९ :- करमाडजवळील शिवसमर्थ पेट्रोल पंपावर भरदिवसा घडलेल्या थरारक घटनेने परिसरात एकच खळबळ उडाली आहे. पेट्रोल पंपावर काम करणारी तरुणी पूजा सुदाम गावंडे हिचा तिच्याच प्रियकराने धारदार चाकूने वार करून निर्घृणपणे खून केला. ही संपूर्ण घटना सीसीटीव्हीत कैद झाली असून पाहणाऱ्यांचे मन सुन्न करणारी आहे.

सत्यम रावसाहेब गावंडे असे आरोपी प्रियकराचे नाव असून, त्याने दुपारी सुमारे १२.३० वाजेच्या सुमारास हा थरारक प्रकार घडवला. घटनेनंतर परिसरात भीतीचे वातावरण पसरले होते.

मिळालेल्या माहितीनुसार, पूजा आणि सत्यम यांनी नोव्हेंबर महिन्यात विवाह केला होता. मात्र, लग्नानंतर त्यांच्यात सतत वाद होत असल्याने ते सध्या विभक्त राहत होते. या वादातूनच हा खून झाल्याची प्राथमिक शक्यता व्यक्त केली जात आहे.

घटनेची माहिती मिळताच करमाड पोलिसांनी तातडीने कारवाई करत अवघ्या दोन तासांत आरोपीच्या मुसक्या आवळल्या. करमाड पोलीस ठाण्यात खुनाचा गुन्हा दाखल करण्यात आला असून पुढील तपास सुरू आहे.

या प्रकरणाबाबत अधिक माहिती देताना पोलिस अधीक्षक डॉ. विनयकुमार राठोड यांनी सांगितले की, “खून का केला, याचे नेमके कारण तपासातून समोर येईल.”

👉 प्रेमाच्या नात्याचा असा रक्तरंजित शेवट... समाजाला विचार करायला भाग पाडणारी घटना!