ढोरेगावच्या जिल्हा परिषद शाळेत विद्यार्थ्यांना जंतनाशक गोळ्यांचे वाटप

ढोरेगाव, ता. गंगापूर दि २७ :- बालकांमधील जंतसंसर्ग, रक्तक्षय आणि कुपोषणाचा धोका कमी करून त्यांचे आरोग्य सुदृढ राखण्याच्या उद्देशाने जिल्हा परिषद केंद्रीय प्राथमिक शाळा, ढोरेगाव येथे मंगळवार, दि. २७ ऑक्टोबर रोजी विद्यार्थ्यांना जंतनाशक गोळ्यांचे वाटप करण्यात आले. आरोग्य विभागाच्या मार्गदर्शक सूचनांनुसार राबविण्यात आलेल्या या मोहिमेला विद्यार्थ्यांचा सकारात्मक प्रतिसाद मिळाला.

बालकांच्या शरीरात जंतसंसर्ग झाल्यास पोषकद्रव्यांच्या शोषणावर परिणाम होऊन रक्तक्षय आणि कुपोषणाचा धोका वाढू शकतो. याचा परिणाम मुलांच्या शारीरिक वाढीवर तसेच बौद्धिक विकासावर होण्याची शक्यता असते. त्यामुळे बालकांचे आरोग्य सुरक्षित ठेवण्यासाठी जंतनाशक औषधोपचारांना महत्त्व आहे. या मोहिमेत अल्बेंडाझोल या जंतनाशक औषधाचा वापर करण्यात येतो.

स्वच्छतेच्या सवयींबाबत विद्यार्थ्यांना मार्गदर्शन

जंतसंसर्ग रोखण्यासाठी औषधोपचारांसोबत वैयक्तिक स्वच्छता राखणेही आवश्यक आहे. याबाबत विद्यार्थ्यांना जेवणापूर्वी आणि शौचालयाचा वापर केल्यानंतर हात स्वच्छ धुणे, स्वच्छ पाणी पिणे, अनवाणी फिरणे टाळणे, शौचालयाचा नियमित वापर करणे आणि परिसर स्वच्छ ठेवणे याबाबत मार्गदर्शन करण्यात आले.

“बालकांचे आरोग्य सुदृढ राहण्यासाठी आणि त्यांची शारीरिक व बौद्धिक वाढ योग्य प्रकारे होण्यासाठी जंतसंसर्गावर वेळीच प्रतिबंध करणे आवश्यक आहे. नियमित आरोग्य तपासणी, आवश्यकतेनुसार जंतनाशक औषधोपचार आणि स्वच्छतेच्या सवयी यांमुळे बालकांच्या आरोग्याचे संरक्षण करण्यास मदत होते. त्यामुळे पालकांनीही अशा आरोग्य मोहिमांना सहकार्य करावे,” असे मत केंद्रीय मुख्याध्यापक राजेश हिवाळे यांनी व्यक्त केले.

शिक्षकांची उपस्थिती

या उपक्रमावेळी केंद्रीय मुख्याध्यापक राजेश हिवाळे यांच्यासह मनोज घुले, शंकर राऊत, दिलीप धर्माधिकारी, भाऊसाहेब गाढवे, नीलिमा कुलकर्णी, मुग्धा निमसे, परमेश्वर मस्के, अली बाकोदा, सचिन पाटसकर, शामीर शेख आणि कल्याणी जगताप आदी शिक्षक उपस्थित होते.

महाराष्ट्र वाणी | सत्यासाठी निर्भीड, जनतेसाठी समर्पित