‘कार्ड काढले, पण आलेच नाही; मग ज्येष्ठांनी प्रवास करायचा कसा?’ — NCMCच्या गोंधळाने एसटी प्रवाशांचे हाल, शासनाने तातडीने तोडगा काढण्याची मागणी

महाराष्ट्र वाणी

छत्रपती संभाजीनगर (औरंगाबाद) दि २ :- एसटी प्रवासासाठी NCMC कार्ड अनिवार्य करण्यात आल्यानंतर अनेक प्रवाशांसमोर गंभीर अडचणी निर्माण झाल्याच्या तक्रारी वाढत आहेत. कार्ड काढूनही ते अद्याप सक्रिय होत नसल्याने, रिचार्ज केल्यानंतर पैसे कार्डमध्ये जमा न झाल्याने तसेच अनेक प्रवाशांचे कार्ड मुंबईहून अद्याप प्राप्त न झाल्याने ज्येष्ठ नागरिक आणि महिलांना मोठ्या त्रासाला सामोरे जावे लागत आहे.

१ सप्टेंबरपासून एसटी प्रवासात सवलतीचा लाभ घेण्यासाठी NCMC कार्डाची अट लागू करण्यात आल्यानंतर परिस्थिती अधिकच गंभीर झाल्याचे प्रवाशांचे म्हणणे आहे. अनेक ज्येष्ठ नागरिकांनी NCMC कार्डसाठी आवश्यक प्रक्रिया पूर्ण करून शुल्कही भरले आहे. मात्र, त्यांच्याकडे अद्याप कार्ड पोहोचलेले नाही. काहींच्या हातात केवळ कार्ड काढल्याची पावती आहे. असे असतानाही एसटी बसमध्ये प्रवास करताना त्यांना सवलतीचा लाभ मिळत नसून पूर्ण तिकीट काढण्यास सांगितले जात आहे.

‘पावती आहे, मग सवलत का नाही?’ असा ज्येष्ठांचा सवाल

ज्येष्ठ नागरिकांचे म्हणणे आहे की, शासनाने NCMC कार्डसाठी अर्ज स्वीकारला असून त्याची पावतीही दिली आहे. मात्र, कार्ड मुंबईहून येण्यास विलंब होत असल्याची शिक्षा प्रवाशांना का दिली जात आहे, असा सवाल उपस्थित केला जात आहे.

विशेषतः ७५ वर्षांवरील ज्येष्ठ नागरिकांना मोफत एसटी प्रवासाची सुविधा आहे. त्यामुळे अनेक वृद्ध प्रवासी प्रवासाला निघताना खिशात केवळ शंभर-दोनशे रुपये घेऊन बाहेर पडतात. मात्र, बसमध्ये चढल्यानंतर कंडक्टरकडून NCMC कार्ड नसल्याने पूर्ण तिकीट काढावे लागेल, असे सांगितले जात असल्याच्या तक्रारी आहेत.

अनेक ज्येष्ठ नागरिकांकडे पूर्ण प्रवासाचे तिकीट काढण्यासाठी पुरेसे पैसे नसल्याने त्यांच्यासमोर मोठी अडचण निर्माण होत आहे. काही वेळा तर वृद्ध प्रवाशांना बसमधून खाली उतरावे लागल्याची व्यथा नागरिकांनी व्यक्त केली आहे. त्यानंतर हे प्रवासी एसटी स्थानकावर एका कार्यालयातून दुसऱ्या कार्यालयात जाऊन माहिती विचारत फिरत असल्याचे चित्र आहे.

महिला आणि ६५ वर्षांवरील पुरुषही त्रस्त

या तांत्रिक आणि प्रशासकीय गोंधळाचा फटका केवळ ७५ वर्षांवरील नागरिकांनाच नाही, तर सवलतीसाठी पात्र असलेल्या महिला आणि ६५ वर्षांवरील पुरुष प्रवाशांनाही बसत असल्याचे सांगण्यात येत आहे.

अनेकांनी कार्डसाठी अर्ज केला आहे, काहींचे कार्ड आले असले तरी ते सक्रिय होत नसल्याच्या तक्रारी आहेत. तर काही प्रवाशांनी कार्डमध्ये पैसे जमा केले असतानाही रिचार्जची रक्कम कार्डमध्ये दिसत नसल्याचा आरोप केला आहे. त्यामुळे प्रवाशांना कार्ड असूनही त्याचा उपयोग करता येत नसल्याची परिस्थिती निर्माण झाली आहे.

वृद्ध आणि महिलांना तांत्रिक प्रक्रियेचा मोठा त्रास

NCMC कार्डाची नोंदणी, सक्रिय करणे, रिचार्ज करणे आणि कार्डमध्ये रक्कम जमा झाल्याची खात्री करणे ही प्रक्रिया अनेक वृद्ध नागरिकांसाठी अत्यंत किचकट ठरत आहे. मोबाईल आणि डिजिटल व्यवहारांची सवय नसलेल्या ज्येष्ठांना या प्रक्रियेमुळे मोठ्या मानसिक त्रासाला सामोरे जावे लागत आहे.

वृद्ध नागरिक वारंवार एसटी स्टँड, कार्ड केंद्र आणि संबंधित कार्यालयांमध्ये चौकशीसाठी जात आहेत. महिलांनाही या प्रक्रियेमुळे वेळ आणि पैशांचा अतिरिक्त खर्च सहन करावा लागत आहे. शासनाने सवलत देण्याच्या उद्देशाने सुरू केलेली व्यवस्था प्रत्यक्षात प्रवाशांसाठी डोकेदुखी ठरत असल्याची तीव्र भावना नागरिकांमधून व्यक्त होत आहे.

कार्ड येईपर्यंत पावतीवर ‘झिरो तिकीट’ देण्याची मागणी

ज्येष्ठ नागरिकांनी शासन आणि संबंधित विभागाकडे तातडीने हस्तक्षेप करण्याची मागणी केली आहे. ज्यांनी NCMC कार्डसाठी अर्ज करून अधिकृत पावती घेतली आहे, मात्र ज्यांचे कार्ड अद्याप मुंबईहून प्राप्त झालेले नाही, अशा पात्र प्रवाशांना कार्ड मिळेपर्यंत पावतीच्या आधारावर सवलतीचा प्रवास देण्यात यावा, अशी मागणी होत आहे.

विशेषतः ७५ वर्षांवरील पात्र ज्येष्ठ नागरिकांना पावती दाखविल्यानंतर ‘झिरो तिकीट’ देण्यात यावे, अशी ठाम मागणी ज्येष्ठ नागरिकांनी केली आहे. तसेच महिला आणि इतर पात्र ज्येष्ठ नागरिकांनाही कार्ड प्रत्यक्षात मिळेपर्यंत त्यांच्या पावतीच्या आधारे शासनाच्या नियमानुसार सवलत देण्यात यावी, अशी मागणी करण्यात येत आहे.

शासनाने तातडीने निर्णय घ्यावा

NCMC कार्ड व्यवस्था सुरू करण्यापूर्वी सर्व पात्र प्रवाशांना कार्ड उपलब्ध करून देणे, कार्ड तातडीने सक्रिय करणे आणि रिचार्जसंबंधी तांत्रिक अडचणी दूर करणे आवश्यक होते, अशी प्रतिक्रिया नागरिकांमधून व्यक्त होत आहे.

‘कार्ड काढण्याची प्रक्रिया आम्ही पूर्ण केली, पावतीही आमच्याकडे आहे; मग कार्ड उशिरा येण्याची शिक्षा आम्हाला का?’ असा संतप्त सवाल ज्येष्ठ नागरिक विचारत आहेत.

आता तरी शासन आणि संबंधित विभागाने या गंभीर समस्येकडे लक्ष देऊन तातडीने स्पष्ट आदेश काढावेत, कार्ड मिळेपर्यंत पावतीधारक पात्र प्रवाशांना सवलतीचा लाभ द्यावा आणि विशेषतः ७५ वर्षांवरील ज्येष्ठ नागरिकांना पावती दाखविल्यानंतर झिरो तिकीट देण्याची व्यवस्था करावी, अशी जोरदार मागणी होत आहे.

NCMC कार्डाच्या नावाखाली ज्येष्ठ नागरिक, महिला आणि सर्वसामान्य प्रवाशांचा होणारा हा त्रास शासनाच्या डोळ्यांत कधी भरणार आणि या समस्येवर तातडीचा तोडगा कधी निघणार, याकडे आता सर्वांचे लक्ष लागले आहे.