आई-वडील गमावलेल्या दोन हिंदू भावांना मुस्लिम दाम्पत्याने दिले मायेचे छत्र; धर्मापेक्षा माणुसकी ठरली मोठी

महाराष्ट्र वाणी विशेष

बेळगावी दि १३ :- सुमारे दोन दशकांपूर्वी झालेल्या एका भीषण रस्ता अपघातात सोमशेखर आणि त्याच्या भावाने आई-वडिलांना गमावले. लहान वयातच पालकांचे छत्र हरपल्याने दोन्ही भावांवर अनाथ होण्याची वेळ आली. मात्र, या कठीण प्रसंगी बेळगावी येथील मेहबूब हसन नाईकवाडी आणि नूरजहाँ या मुस्लिम दाम्पत्याने पुढे येत दोन्ही भावांना आधार दिला.

या दाम्पत्याला स्वतःची पाच मुले असतानाही त्यांनी या दोन हिंदू मुलांना परके मानले नाही. उलट त्यांना आपल्या कुटुंबातील सदस्यांप्रमाणे प्रेम, आधार आणि सुरक्षितता दिली. त्यांच्या शिक्षणाची तसेच संगोपनाची जबाबदारी स्वीकारत दोन्ही भावांच्या भवितव्यासाठी त्यांनी सातत्याने प्रयत्न केले.

विशेष म्हणजे, मुलांच्या धार्मिक श्रद्धा आणि संस्कृतीचा त्यांनी पूर्ण आदर केला. स्वतः मुस्लिम असूनही त्यांनी दोन्ही मुलांवर धर्म किंवा विचार लादण्याचा प्रयत्न केला नाही. त्यांच्या हिंदू धर्मातील परंपरा आणि संस्कृती जपण्यासाठी त्यांनी त्यांना स्वातंत्र्य दिले.

सोमशेखरने शिक्षण पूर्ण करून नोकरी मिळवल्यानंतर या दाम्पत्याने त्याच्या विवाहाची जबाबदारीही प्रेमाने स्वीकारली. सोमशेखर लिंगायत समाजातील असल्याने त्याच समाजातील वधू शोधून त्याचा विवाह लावून देण्यात आला. लिंगायत समाजाच्या परंपरेनुसार झालेल्या या विवाह सोहळ्यात मेहबूब आणि नूरजहाँ यांनी जन्मदात्या आई-वडिलांप्रमाणे सर्व जबाबदाऱ्या पार पाडल्या.

या संपूर्ण प्रवासात धर्म, जात किंवा सामाजिक भेदभावापेक्षा माणुसकीला प्राधान्य देण्याचा संदेश या कुटुंबाने दिला. रक्ताचे नाते नसतानाही प्रेम, त्याग आणि जिव्हाळ्याने निर्माण झालेले हे नाते आज समाजासमोर एक प्रेरणादायी उदाहरण ठरत आहे.

धर्माच्या नावावर समाजात मतभेद निर्माण होत असताना बेळगावीतील या कुटुंबाची कहाणी माणुसकीचा सकारात्मक संदेश देणारी आहे.

हा द्वेषाचा नव्हे, तर प्रेम आणि माणुसकीचा भारत आहे.