💍 “सामूहिक विवाहाची प्रेरणादायी परंपरा; नानेगावचा आदर्श राज्यभर गाजतोय!”

महाराष्ट्र वाणी

नानेगाव (ता. सिल्लोड) दि. ९ :- नानेगाव येथे आयोजित मुस्लिम सामूहिक विवाह सोहळा (इज्तेमाई शादीया) उत्साहात पार पडला. या सोहळ्यास आमदार अब्दुल सत्तार यांनी उपस्थित राहून नवदाम्पत्यांना मार्गदर्शन केले तसेच त्यांच्या आयुष्यात सुख, समृद्धी आणि आनंद नांदो, अशा शुभेच्छा दिल्या.

गेल्या अनेक वर्षांपासून नानेगावमध्ये हा सामूहिक विवाह सोहळा सातत्याने पार पडत असून, सामाजिक ऐक्य आणि बांधिलकी जपणारी ही एक प्रेरणादायी परंपरा बनली आहे. विशेष म्हणजे, या उपक्रमामुळे सर्वसामान्य कुटुंबांवरील विवाहाचा आर्थिक बोजा मोठ्या प्रमाणात कमी होतो, त्यामुळे अनेक कुटुंबांना मोठा दिलासा मिळतो.

यावर्षी तब्बल 44 जोडप्यांचा विवाह या सोहळ्यात लावण्यात आला. दुर्गम भागात असलेल्या नानेगावमधील ग्रामस्थांनी वर्षानुवर्षे जपलेली ही परंपरा आज समाजासाठी एक आदर्श ठरत आहे. या सोहळ्याला गावकऱ्यांनी ‘सम्मेलन’ असे नाव दिले असून, सामूहिकतेची भावना अधिक बळकट करण्याचा हा प्रयत्न आहे.

आजच्या वाढत्या खर्चाच्या आणि दिखाव्याच्या युगात, नानेगावने साधेपणा आणि एकोप्याचा संदेश देत एक वेगळा आदर्श समाजासमोर ठेवला आहे. मोठ्या शहरांतील नागरिकांनीही या गावाकडून प्रेरणा घेण्याची गरज असल्याचे मत व्यक्त होत आहे.

👉 समाजप्रबोधनाचा संदेश देणारा हा उपक्रम केवळ विवाह सोहळा नसून, एक सामाजिक चळवळ बनत चालली आहे!