संतोष पारखी यांच्या प्रयत्नांना यश; वनभूमीधारकांवर अन्याय करणाऱ्या अधिकाऱ्यांवर कारवाईचा आदेश, नुकसानभरपाईचे आश्वासन!

महाराष्ट्र वाणी न्युज 

चंद्रपूर दि १६ :- वनभूमीधारकांच्या शेतजमिनीवर जेसिबीद्वारे बळजबरीने नाली, गड्ढे आणि वॉलकंपाऊंड करून शेतीवर बंदी घालणाऱ्या दोषी अधिकाऱ्यांवर कारवाई करण्याचे आश्वासन उपवनसंरक्षक लेफ्टनंट कुशाग्र पाठक यांनी दिले आहे. शिवसेना चंद्रपूर तालुका प्रमुख व भारतीय कामगार संघटनेचे जिल्हाध्यक्ष संतोष पारखी यांनी तक्रारदार वनभूमीधारकांच्या वतीने तीन वर्षांपासून लढा दिल्यानंतर हा निर्णय मिळाला आहे.

वनहक्क कायदा २००६, नियम २००८ व सुधारित नियम २०१२ नुसार अनुसूचित जमाती आणि पारंपारिक वननिवासींना त्यांच्या शेती आणि उपजीविकेचा कायदेशीर हक्क आहे. तरीही वनविभागाच्या अधिकाऱ्यांनी या जमिनींवर अतिक्रमणासारखी कारवाई करून शेतकऱ्यांची उपजीविका धोक्यात आणली. अनेक ठिकाणी जेसिबीद्वारे नाली व तारफेन्सिंग करून झाडे लावण्यात आली आणि शेती करण्यास मनाई करण्यात आली होती.

संतोष पारखी यांनी या अन्यायाविरोधात प्रशासन आणि वनविभागाविरुद्ध सातत्याने पाठपुरावा केला. अखेर त्यांनी उपवनसंरक्षक कुशाग्र पाठक यांची भेट घेतली असता, संबंधित वनभूमीधारकांची माहिती सादर केल्यास दोषी अधिकाऱ्यांवर तात्काळ कारवाई करून नुकसानभरपाईची प्रक्रिया सुरू केली जाईल, असे त्यांनी आश्वासन दिले.

दरम्यान, पारखी यांनी जिल्हाधिकाऱ्यांकडे व पालकमंत्र्यांकडेही वारंवार निवेदन देऊन वनहक्क कायद्याची प्रभावी अंमलबजावणी करण्याची मागणी केली आहे. मात्र, अद्याप प्रशासनाकडून गंभीर दखल न घेतल्यामुळे आदिवासी कुटुंबांवर उपासमारीची वेळ आली आहे.

✍️ महाराष्ट्र वाणी — वनहक्कांची लढाई अजूनही सुरूच...