शेतकरी आंदोलनाला जोरदार पाठिंबा; मनोज जरांगे पाटील नागपूरकडे रवाना

महाराष्ट्र वाणी न्युज 

जालना दि २९ :- मराठा आरक्षण आंदोलनाचे नेतृत्व करताना राज्यभरात ओळख निर्माण करणारे मनोज जरांगे पाटील आता शेतकरी आंदोलनाच्या पाठीशी उभे राहिले आहेत. प्रहार संघटनेचे नेते बच्चू कडू यांच्या नेतृत्वाखाली नागपूरमध्ये सुरू असलेल्या शेतकरी आंदोलनाला थेट समर्थन देण्यासाठी ते आज नागपूरकडे रवाना झाले.

निघण्यापूर्वी माध्यमांशी बोलताना जरांगे पाटील म्हणाले,

"शेतकरी आज अतिशय कठीण परिस्थितीतून जात आहे. नागपूरमध्ये हजारो शेतकरी न्यायासाठी लढत आहेत. अतिटटीच्या काळात आपण आपल्या शेतकरी मायबापांसोबत उभं राहणं ही आपली जबाबदारी आहे. सरकारकडून न्याय मिळावा म्हणून आम्हीदेखील आंदोलनाला नैतिक पाठिंबा देण्यासाठी नागपूरकडे जात आहोत."

दरम्यान, शेतकरी कर्जमाफी आणि अतिवृष्टी अनुदानाच्या मुद्द्यावरून आंदोलनाला तीव्र वळण मिळालं आहे. सरकारच्या प्रतिनिधीमंडळासोबत बच्चू कडू यांनी प्राथमिक चर्चा केली असली तरी ठोस निर्णय न झाल्याने शेतकरी अजूनही आंदोलनावर ठाम आहेत. उद्या बच्चू कडू यांची उपमुख्यमंत्री देवेंद्र फडणवीस यांच्याशी बैठक होणार आहे.

सरकारला थेट इशारा देताना बच्चू कडू म्हणाले,

"कर्जमुक्तीची घोषणा झाली नाही तर रेल्वे रोको आंदोलन अपरिहार्य होणार आहे. सरकारने तारीख जाहीर करावी, अन्यथा लढा अधिक तीव्र करण्यात येईल."

राज्यातील शेतकऱ्यांचे संकट दिवसेंदिवस वाढत असताना आता या आंदोलनात मनोज जरांगे पाटील यांच्या सहभागामुळे आंदोलनाला आणखी वेग मिळण्याची शक्यता व्यक्त केली जात आहे.

➡️ शेतकऱ्यांचा लढा निर्णायक टप्प्यात; सरकारचा निर्णय काय येणार याकडे राज्याचे लक्ष!