वोटचोरीनंतर आता ‘खतचोरी’ — अंबादास दानवे X वर भाजपवर घणाघात

महाराष्ट्र वाणी न्युज 

छत्रपती संभाजीनगर(सिल्लोड) दि ७ :– शिवसेना (उद्धव बाळासाहेब ठाकरे) पक्षाचे नेते आणि विधानपरिषदेचे माजी विरोधी पक्षनेते अंबादास दानवे यांनी पुन्हा एकदा भाजपवर निशाणा साधला आहे. नुकतीच त्यांनी X (पूर्वीचे ट्विटर) वरून एक पोस्ट करत भाजपवर *‘खतचोरी’*चा आरोप करत जोरदार हल्लाबोल केला आहे.

दानवे यांनी त्यांच्या पोस्टमध्ये म्हटले आहे की, “वोटचोरी नंतर सादर आहे भाजपचा ‘खतचोरी’चा एपिसोड! सिल्लोडमधील भाजप कार्यकर्ते सरकारी खतांच्या बॅगांमध्ये बोगस खत भरून विक्री करत आहेत.”

त्यांनी पुढे लिहिले आहे की, साधारण २५० रुपयांचे डुप्लिकेट खत शासकीय खतांच्या बॅगांमध्ये भरून बाजारात १,१५० रुपयांपर्यंत विकले जात आहे. ही सर्रास सुरू असलेली लूट शेतकऱ्यांवर अन्याय करणारी असून, “भाजपच्या रूपाने कुंपणच शेत खात आहे,” असा थेट आरोप त्यांनी केला आहे.

दानवे यांनी या प्रकरणात भाजपच्या कार्यकर्त्यांची नावे आपल्याकडे असल्याचा दावा करत, संबंधित प्रकरणात कृषी विभागावर दबाव आणण्याचाही प्रयत्न होत असल्याचा आरोप केला आहे. त्यांनी भाजपच्या वरिष्ठ नेतृत्वाने या घटनेवर उत्तर द्यावे आणि दोषींवर कारवाई करावी, अशी मागणी केली आहे.

या गंभीर आरोपांनंतर सिल्लोड आणि परिसरात मोठी राजकीय चर्चा रंगली आहे. स्थानिक पातळीवरही कृषी विभाग आणि प्रशासनाकडे या प्रकरणाची चौकशी करण्याची मागणी होत आहे.

दरम्यान, भाजपकडून अद्याप अधिकृत प्रतिक्रिया आलेली नाही.

🟢 शेतकऱ्यांचा सवाल — खताची गुणवत्ता कोण बघणार, आणि जबाबदारी कोण घेणार?

 महाराष्ट्र वाणी — सत्याचा आवाज, जनतेच्या हक्कासाठी ठाम!