“विद्यार्थ्यांचा आदर्श, निराधारांचा आधार – रामदास वाघमारे सरांना ‘क्रांतीसुर्य प्रेरणा पुरस्कार’!”

महाराष्ट्र वाणी न्युज 

छत्रपती संभाजीनगर(औरंगाबाद) दि २९ :- शिक्षणाच्या माध्यमातून हजारो विद्यार्थ्यांचे आयुष्य घडवणारे आणि समाजातील निराधार, अनाथ, वृद्ध यांच्या सेवेसाठी स्वतःचे जीवन समर्पित करणारे रामदास रखमाजी वाघमारे यांना नाशिक येथे आयोजित भव्य सोहळ्यात “क्रांतीसुर्य प्रेरणा पुरस्कार” देऊन सन्मानित करण्यात आले.

गेल्या अनेक दशकांपासून छत्रपती प्राथमिक विद्यालयात आदर्श शिक्षक म्हणून कार्यरत असलेले वाघमारे सर विद्यार्थ्यांसाठी प्रेरणास्थान ठरले आहेत. वर्गात मार्गदर्शन करणारे तेवढेच नव्हे तर समाजातील वंचित घटकांसाठी त्यांनी केलेले कार्य तितकेच मोलाचे आहे. “माई वृद्धाश्रम” या संस्थेच्या माध्यमातून असंख्य निराधार वृद्धांना त्यांनी आधार, निवारा आणि कुटुंबाचा भाव दिला आहे. वृद्धाश्रमातील प्रत्येक रहिवासी त्यांना संचालक म्हणून नव्हे तर “आपुलकीचा आधार” म्हणून मानतो.

नाशिक येथील परशुराम सायखेडकर सभागृहात झालेल्या या पुरस्कार सोहळ्याचे उद्घाटन दैनिक पुण्यनगरीचे संपादक किरणजी लोखंडे यांच्या हस्ते झाले. कार्यक्रमाचे अध्यक्षस्थान नितीनजी ठाकरे यांनी भूषवले. प्रमुख पाहुणे म्हणून डीवायएसपी वासुदेव देसले, प्रा. डॉ. आनंद अहिरे व योगेश जाधव आदी मान्यवर उपस्थित होते. या मान्यवरांच्या शुभहस्ते वाघमारे सरांचा गौरव करण्यात आला.

शिक्षण व समाजसेवा यांचा सुंदर संगम साधणारे वाघमारे सर हे खऱ्या अर्थाने “विद्यार्थ्यांच्या भविष्याचे मार्गदर्शक” व “निराधारांच्या जीवनाचे आधारस्तंभ” ठरले आहेत. त्यांच्या या सन्मानाने संपूर्ण संभाजीनगरात अभिमानाची भावना पसरली आहे. कुटुंबीय, सहकारी शिक्षक, मित्रपरिवार आणि समाजातील विविध स्तरांतून त्यांच्यावर अभिनंदनाचा वर्षाव होत आहे.

हा पुरस्कार केवळ एका व्यक्तीचा गौरव नसून, “खरी प्रेरणा ही सेवेतीलच असते” या तत्त्वाला समाजाने दिलेली मान्यता आहे.

 “समाजासाठी जगणाऱ्यांचा सन्मान, हीच खरी प्रेरणा!”