लातूरची शान! रेणापूरच्या सय्यद मदिया खदीरचा पंतप्रधान नरेंद्र मोदी यांच्या हस्ते दिल्लीमध्ये गौरव

महाराष्ट्र वाणी न्युज 

दिनांक ४ (प्रतिनिधी) :– लातूर जिल्ह्याच्या रेणापूर (ता. रेणापूर) येथील श्रीराम विद्यालयातील विद्यार्थीनी सय्यद मदिया खदीर हिने ITI इलेक्ट्रिशन या शाखेत देशात दुसरे स्थान मिळवत लातूर जिल्ह्याचे नाव उज्ज्वल केले आहे. तिच्या या उल्लेखनीय यशाची दखल घेत पंतप्रधान नरेंद्र मोदी यांच्या हस्ते दिल्ली येथे तिचा विशेष स्वागत व सत्कार करण्यात आला.

सय्यद मदिया ही लातूर ग्रामिण मतदारसंघाचे आमदार रमेशअप्पा कराड यांच्या मतदारसंघातील विद्यार्थिनी असून, तिच्या या यशामुळे संपूर्ण जिल्ह्यात अभिमानाची भावना व्यक्त केली जात आहे.

राष्ट्रीय स्तरावर झालेल्या आयटीआय स्पर्धा परीक्षेत इलेक्ट्रिशन या शाखेत सय्यद मदिया खदीर हिने देशभरातून दुसरे स्थान पटकावले. तिच्या मेहनतीला आणि जिद्दीला देशभरातून दाद मिळाली आहे.

या गौरवाच्या क्षणी पंतप्रधान नरेंद्र मोदी यांनी स्वतः तिचा सत्कार करून प्रोत्साहन दिले. दिल्लीतील या सोहळ्याला देशभरातील आयटीआय विद्यार्थी आणि अधिकारी उपस्थित होते.

आमदार रमेशअप्पा कराड यांनी सांगितले की, “ग्रामीण भागातील विद्यार्थिनीने राष्ट्रीय स्तरावर असे यश मिळवणे ही मोठी अभिमानास्पद गोष्ट आहे. यामुळे ग्रामीण विद्यार्थ्यांनाही प्रेरणा मिळेल.”

सय्यद मदिया खदीर हिच्या या यशामुळे रेणापूरसह लातूर जिल्हाभरातून तिच्यावर अभिनंदनाचा वर्षाव होत आहे. शाळा, कुटुंबीय आणि स्थानिक नागरिकांनी तिचे अभिनंदन करत उज्ज्वल भविष्याच्या शुभेच्छा दिल्या.

 लातूरची कन्या देशात दुसरी – पंतप्रधानांच्या हस्ते गौरव, जिल्ह्याचा अभिमान!

महाराष्ट्र वाणी | सत्य घटनांचा आवाज