लाडकी बहीण योजना: सरकारचा नवा आदेश जारी, e-KYC प्रक्रियेत महिलांसाठी दिलासा!

महाराष्ट्र वाणी - Ladaki Bahin Yojana:

मुंबई (प्रतीनीधी) दि १९ :- मुख्यमंत्री माझी लाडकी बहीण योजनेच्या लाभार्थ्यांसाठी राज्य शासनाने पुन्हा एक महत्त्वपूर्ण निर्णय घेतला असून, e-KYC प्रक्रियेत काही सुधारित नियम लागू केले आहेत. याबाबतचा नवीन सरकारी आदेश अधिकृतरित्या जाहीर करण्यात आला असून, महिलांना आता ही प्रक्रिया कोणत्या कागदपत्रांसह पूर्ण करावी लागेल याबाबत स्पष्ट मार्गदर्शक तत्त्वे देण्यात आली आहेत.

पूर्वी लाभार्थींना 18 नोव्हेंबरपर्यंत e-KYC करण्याची मुदत दिली होती. मात्र नैसर्गिक आपत्ती, तांत्रिक अडचणी आणि विविध कारणांमुळे अनेक महिलांना प्रक्रिया वेळेत पूर्ण करता आली नाही. या अडचणींचा विचार करून सरकारने e-KYC ची अंतिम मुदत वाढवून ती 31 डिसेंबर 2025 पर्यंत केली आहे.

👉 हयात नसलेल्या पती/वडिलांच्या महिलांना दिलासा

केवायसी करताना ज्यांच्या पती किंवा वडील हयात नाहीत, अशा अनेक महिलांना मोठ्या प्रमाणात तांत्रिक अडचणींचा सामना करावा लागत होता. या समस्येवर उपाय म्हणून सरकारने नवी पद्धत लागू केली आहे.

आता अशा महिलांनी —

स्वतःची e-KYC प्रक्रिया नियमितपणे पूर्ण करावी

पती किंवा वडील यांचे अधिकृत मृत्यू प्रमाणपत्र,

घटस्फोट प्रमाणपत्र किंवा

न्यायालयीन आदेशाची सत्यप्रत

ही कागदपत्रे आपल्या जिल्ह्यातील महिला व बालविकास अधिकाऱ्यांकडे जमा करणे अनिवार्य राहील.

👉 मंत्री आदिती तटकरे यांचे स्पष्टीकरण

महिला व बालविकास मंत्री आदिती तटकरे यांनी सांगितले की, राज्यातील लाखो महिलांना या योजनेचा लाभ अखंडितपणे मिळावा यासाठीच ही मुदतवाढ देण्यात आली आहे. e-KYC अजून केले नसलेल्या पात्र महिलांनी या विस्तारित मुदतीचा लाभ घ्यावा, असे आवाहन त्यांनी केले.