"राज्य शिक्षक गौरव पुरस्कार सोहळा : १११ शिक्षकांचा सन्मान, शिक्षक राष्ट्राचे ब्रँड अॅम्बेसेडर – अजित पवार"

महाराष्ट्र वाणी न्युज 

मुंबई (प्रतीनीधी) दि २२ :- क्रांतीज्योती सावित्रीमाई फुले राज्य शिक्षक गौरव पुरस्कारांचा भव्य सोहळा एनसीपीएच्या टाटा थिएटर येथे पार पडला. उपमुख्यमंत्री अजित पवार यांच्या हस्ते राज्यातील एकूण १११ गुणवंत शिक्षकांना सन्मानित करण्यात आले. या वेळी विधानसभा अध्यक्ष ॲड. राहुल नार्वेकर, शालेय शिक्षण मंत्री दादाजी भुसे, राज्यमंत्री डॉ. पंकज भोयर, आमदार ज. मो. अभ्यंकर, ज्ञानेश्वर म्हात्रे, मनीषा कायंदे, शिक्षण विभागाचे प्रधान सचिव रणजितसिंह देओल, शिक्षण आयुक्त सचिंद्रप्रताप सिंह यांच्यासह पुरस्कारप्राप्त शिक्षक व त्यांच्या कुटुंबीयांची उपस्थिती होती.

शिक्षकांच्या कार्याचा गौरव करताना अजित पवार म्हणाले, “शिक्षक विद्यार्थ्यांच्या आयुष्यात ज्ञानाचा दीप प्रज्वलित करतात. पाठ्यपुस्तकांबरोबरच कौशल्य, टीमवर्क, मूल्याधारित शिक्षण आणि समस्यांवर उपाय शोधण्याची क्षमता देऊन ते सक्षम पिढी घडवतात. पुरस्कारप्राप्त शिक्षक हे राज्याचे ‘ब्रँड अॅम्बेसेडर’ आहेत.”

शालेय शिक्षण मंत्री दादाजी भुसे यांनी पुढील वर्षापासून कला आणि क्रीडा क्षेत्रातील शिक्षकांनाही पुरस्कार देण्याची घोषणा केली. तसेच जिल्हा स्तरावरील आदर्श शैक्षणिक कामगिरी करणाऱ्या जिल्ह्यांना अनुक्रमे ५ कोटी, ३ कोटी व २ कोटींची पारितोषिके देण्यात येतील, असेही त्यांनी सांगितले.

विधानसभा अध्यक्ष ॲड. राहुल नार्वेकर यांनी सांगितले की, “भारत हा युवकांचा देश आहे. युवकांना कौशल्यसंपन्न बनवले तर जग भारताशिवाय पुढे जाऊ शकणार नाही. भारत हे जगाचे ग्रोथ इंजिन ठरेल.”

उपमुख्यमंत्री एकनाथ शिंदे यांनी शुभेच्छा संदेशाद्वारे शिक्षकांचा गौरव करताना म्हटले की, “कोविडच्या कठीण काळातही शिक्षकांनी शिक्षण थांबू दिले नाही. त्यांचे कार्य महाराष्ट्रासाठी अभिमानास्पद आहे.”

शिक्षकांचा सन्मान म्हणजेच राष्ट्रनिर्मितीला बळ – महाराष्ट्र वाणी सदैव शिक्षकांच्या पाठीशी!