मुख्यमंत्री फडणवीस यांच्या ‘चुकीच्या पत्रावर’ इम्तियाज जलील यांचा टोला — “मुख्यमंत्र्यांनाच रस्ता कोणाच्या अखत्यारित आहे हे माहीत नाही!”

महाराष्ट्र वाणी न्युज 

छत्रपती संभाजीनगर(औरंगाबाद) दि ७ :– मुख्यमंत्री देवेंद्र फडणवीस यांनी पुणे–छत्रपती संभाजीनगर–अहिल्यानगर महामार्गाच्या दुरुस्तीबाबत राष्ट्रीय महामार्ग प्राधिकरणाला (NHAI) पत्र लिहिल्यानंतर या पत्रावरून राजकीय वर्तुळात नवा वाद निर्माण झाला आहे. माजी खासदार इम्तियाज जलील यांनी मुख्यमंत्री फडणवीस यांच्या पत्रावर थेट टीका करत प्रशासनिक आणि तांत्रिक बाबींची स्पष्टता नसल्याचे नमूद केले आहे.

 जलील यांनी म्हटले की, “हे धक्कादायक आहे की राज्याचे मुख्यमंत्री सुद्धा हे जाणून नाहीत की हा रस्ता NHAI च्या अखत्यारित नसून राज्य सार्वजनिक बांधकाम विभागाच्या (PWD) अखत्यारित आहे आणि तो वर्ल्ड बँक प्रकल्पांतर्गत येतो.”

जलील यांनी पुढे सरकारवर टीका करताना म्हटले की, “मुख्यमंत्र्यांना हे पत्र लिहायला लावणाऱ्यांना तरी योग्य माहिती असायला हवी होती. एवढ्या काळानंतर सरकारची झोप उघडली ती सुद्धा चुकीच्या माहितीवर आधारित आहे. नागरिकांना दाखवण्यासाठी केलेली ही कागदोपत्री हालचाल प्रत्यक्षात निरर्थक आहे.”

या वक्तव्यामुळे राज्य सरकारच्या पायाभूत सुविधा विषयक समन्वयावर प्रश्नचिन्ह निर्माण झाले आहे. पुणे–छत्रपती संभाजीनगर–अहिल्यानगर महामार्गाच्या निकृष्ट स्थितीबाबत काही दिवसापूर्वी जलील यांनी त्यांच्या फेसबूक वर एक विडियो वायरल केला होता व स्थानिक नागरिक आणि प्रवाशांकडून वारंवार तक्रारी करण्यात येत होत्या, रस्त्याच्या दुरुस्तीबाबत ठोस कारवाई न झाल्याने जनतेत नाराजी आहे.

जलील यांच्या या वक्तव्यानंतर आता राज्य सरकार आणि मुख्यमंत्री कार्यालयाकडून कोणती प्रतिक्रिया येते, याकडे सर्वांचे लक्ष लागले आहे.

रस्ता दुरुस्तीसाठी पत्र गेले की ‘राजकीय रस्ता’च भरकटला? — संभाजीनगरात चर्चेला उधाण!