"मराठी व उर्दू माध्यमाच्या विद्यार्थ्यांना गावातच दहावीचे शिक्षण उपलब्ध; आमदार विलास भुमरे यांच्या पाठपुराव्याला यश"

महाराष्ट्र वाणी न्युज 

पैठण दि ३० :- ग्रामीण भागातील विद्यार्थ्यांना शिक्षणाची नवी दिशा मिळाली आहे. आमदार विलास भुमरे यांच्या पाठपुराव्यामुळे जिल्हा परिषदेच्या शाळेला अखेर दहावी वर्गाची मान्यता मिळाली आहे. या निर्णयामुळे ग्रामीण भागातील अनेक विद्यार्थ्यांना आता आपल्या गावातच दहावीपर्यंत शिक्षण घेता येणार आहे.

पैठण तालुक्यातील जिल्हा परिषदेच्या मराठी व उर्दू माध्यमाच्या शाळांना दहावी पर्यंत मान्यता मिळावी यासाठी पालकांनी व समस्त गावकऱ्यांनी वेळोवेळी लोकशाही मार्गाने आंदोलने व उपोषण केल्यानंतर सुद्धा अनेक वर्षापासून मागणी प्रलंबितच होती. 

आमदार विलास भुमरे पाटील यांना समक्ष भेटून विद्यार्थ्यांनी व पालकांनी त्यांना होणाऱ्या समस्या व अडचणी मांडल्या होत्या. प्रकरणाचे गांभीर्य लक्षात घेऊन आमदार विलास भुमरे यांनी यशस्वीरित्या पाठपुरावा केल्याने मराठी माध्यमाच्या डोणगाव केंद्र, बालानगर, वरवंडी तांडा केंद्र, निलजगाव, खादगाव येथील शाळा आणि उर्दू माध्यमाच्या बिडकीन, नवगाव, ढोरकरीन, चितेगाव, पिंपळवाडी या गावातील शाळांना 10 वी वर्गास मान्यता मिळाली.

आतापर्यंत विद्यार्थ्यांना उच्च माध्यमिक शिक्षणासाठी दूरवर जावे लागत होते. यामुळे वेळ, प्रवासाचा खर्च आणि सुरक्षितते संबंधी अनेक अडचणी निर्माण होत होत्या. या मान्यतेमुळे विद्यार्थ्यांबरोबरच पालकांनाही मोठा दिलासा मिळाला आहे.

शाळेला दहावीची मान्यता मिळवून देण्यासाठी आमदार विलास भुमरे यांनी सातत्याने प्रयत्न केले. स्थानिक ग्रामस्थ व पालकांनी याबद्दल त्यांचे मनःपूर्वक आभार मानले असून, या उपक्रमामुळे शिक्षण क्षेत्रात ग्रामीण भागाच्या प्रगतीला चालना मिळणार आहे.

“गावागावातील प्रत्येक मुलाला दर्जेदार शिक्षण मिळावे, हीच माझी भूमिका आहे. ग्रामीण भागातील विद्यार्थ्यांसाठी आणखी सुविधा उपलब्ध करून देण्यासाठी प्रयत्न सुरू राहतील, या सर्व मान्यतांसाठी राज्य शासनाचे मनःपूर्वक धन्यवाद” असे आमदार विलास भुमरे पाटील यांनी म्हटले.