“भाजपची बिनविरोध निवडणुका म्हणजे लोकशाहीचा उत्सव की ‘कुटुंब कल्याण योजना’?” आमदार रोहित पवार

महाराष्ट्र वाणी 

मुंबई (प्रतिनिधी) दि २१ :- राज्यातील तीन स्थानिक स्वराज्य संस्थांमध्ये भाजपच्या बिनविरोध निवड झाल्यानंतर आता या घडामोडींवर राष्ट्रवादी काँग्रेस शरदचंद्र पवार पक्षाचे आमदार रोहित पवार यांनी थेट प्रश्न उभा करत जोरदार टीका केली आहे.

हमखास घराणेशाहीचे आरोप करणाऱ्या भाजपनेच आपल्या घरातील सदस्यांना बिनविरोध सत्तेत बसविण्याचे राजकारण सुरू केले आहे, असा आरोप रोहित पवारांनी केला.

त्यांनी नमूद केलं—

 “मा. मुख्यमंत्री देवेंद्र फडणवीस यांचे मामेभाऊ प्रल्हाद कलोती,

ना. गिरीश महाजन यांच्या पत्नी साधनाताई,

तर ना. जयकुमार रावल यांच्या मातोश्री नयनकुवरताई…

तीघांचीही बिनविरोध निवड म्हणजे भाजपची नवीन ‘कुटुंब कल्याण योजना’ दिसते!”

🔹 “बिनविरोध निवडणुका होणं चांगलं, पण फक्त भाजपच्या जागाच बिनविरोध का?”

रोहित पवार म्हणाले —

“निवडणुका बिनविरोध होणं कौतुकास्पद असतं. पण कायम फक्त भाजपच्याच जागा बिनविरोध का राहतात?

विरोधक उमेदवार का मागे हटतात?

साम-दाम-दंड-भेदाचा वापर होत नाही ना?

लोकशाहीचा गळा तर घोटला जात नाही ना?”

त्यांनी सांगितले की, पक्षाने नेहमी लोकशाहीचा अभिमान मिरवला असला तरी प्रत्यक्ष कृतीत मात्र ‘एक कुटुंब, एक पद’ ही पद्धत कोठेच दिसत नाही.

🔹 “तळागाळातील निष्ठावंत कार्यकर्त्यांवर अन्याय”

रोहित पवारांनी भाजपच्या अंतर्गत असंतोषाकडेही लक्ष वेधले.

ते म्हणाले—

“केशव उपाध्ये, माधव भंडारी यांसारखे आयुष्यभर पक्षासाठी झटलेले निष्ठावंत दुर्लक्षित;

आणि पदे मात्र कुटुंबीयांना!

हा अन्याय आहे, आणि यामुळेच भाजपमध्ये नाराजीची लाट आहे.”

🔹 “भाजपने स्वतःला ‘पार्टी विथ डिफरन्स’ म्हणवून घेतलं, पण प्रत्यक्षात ‘डिफरन्स’ फक्त कार्यकर्त्यांशीच!”

शेवटी त्यांनी व्यंगात्मक टोला लगावत म्हटलं—

“भाजपने ‘घराणेशाही’ला विरोध केला, आणि आज त्यांचे निर्णय पाहिले तर वाटतं —

‘पार्टी विथ डिफरन्स’ नाही,

तर ‘फॅमिली विथ प्रेफरन्स’!”

— बिनविरोध निवडणुका आज झाल्या, उद्या बिनविरोध प्रश्न विचारणारेच राहणार नाहीत, ही भीती अधिक मोठी!