बीड बायपासवरील सुरक्षा कठडे दुरुस्त करा; अपघात टाळण्यासाठी मुक्तार कुरैशी यांचे बांधकाम विभागाला निवेदन

छत्रपती संभाजीनगर (औरंगाबाद) दि ११ :- शहरातील बीड बायपास मार्गावरील रस्ते सुरक्षेच्या विविध समस्यांकडे लक्ष वेधत समाजसेवक तथा आरोग्यसेवक मुक्तार अजीम कुरैशी यांनी सार्वजनिक बांधकाम विभागाच्या जागतिक बँक प्रकल्प विभागाच्या कार्यकारी अभियंत्यांकडे दिनांक 8 ऑक्टोबर रोजी निवेदनाद्वारे तातडीच्या उपाययोजना करण्याची मागणी केली आहे.

पैठण टी पॉइंट ते बजाज हॉस्पिटल, एमआयटी कॉलेज, रेणुकामाता मंदिर कमान, देवळाई चौक ते झाल्टा फाटा या मार्गावर अनेक ठिकाणी लोखंडी सुरक्षा कठडे तुटलेल्या अवस्थेत असून काही ठिकाणी ते पूर्णपणे गायब झाल्याचे निवेदनात नमूद करण्यात आले आहे. त्यामुळे वाहनचालकांसह पादचाऱ्यांच्या सुरक्षिततेचा प्रश्न निर्माण झाला असून, परिसरातील शाळांमुळे या मार्गावरून ये-जा करणाऱ्या विद्यार्थ्यांच्या सुरक्षेकडे विशेष लक्ष देण्याची गरज व्यक्त करण्यात आली आहे.

रशीद मामू कॉम्प्लेक्स, पटेल लॉन्स परिसरात विशेष पाहणीची मागणी

रशीद मामू कॉम्प्लेक्स, पटेल लॉन्स आणि बजाज हॉस्पिटल परिसरातील सुरक्षा कठड्यांची तातडीने तपासणी करून तुटलेले कठडे दुरुस्त करावेत तसेच आवश्यक ठिकाणी नवीन कठडे बसवावेत, अशी मागणी कुरैशी यांनी केली आहे.

याशिवाय, बीड बायपासवरील अनेक ठिकाणी पथदिव्यांचा प्रकाश अपुरा असल्याने रात्रीच्या वेळी वाहनचालकांना रस्ता स्पष्टपणे दिसण्यात अडचणी येऊ शकतात. अशा परिस्थितीत अपघातांचा धोका वाढण्याची शक्यता असल्याने संपूर्ण मार्गावरील प्रकाशव्यवस्था सुधारण्याची आवश्यकता निवेदनातून अधोरेखित करण्यात आली आहे.

भरधाव वाहनांवर नियंत्रणासाठी उपाययोजना करा

बीड बायपासवर काही ठिकाणी वाहने वेगाने धावत असल्याने अपघात टाळण्यासाठी आवश्यक त्या ठिकाणी नियमानुसार गतिरोधक बसविणे, वेगमर्यादा दर्शविणारे फलक लावणे, सावधानता सूचना देणारे फलक उभारणे आणि रस्त्यावर आवश्यक सुरक्षा चिन्हे व परावर्तक बसविण्याची मागणीही करण्यात आली आहे.

अपघात होण्यापूर्वीच उपाययोजना करण्याचे आवाहन

एखादी दुर्घटना घडल्यानंतर उपाययोजना करण्यापेक्षा संभाव्य धोके वेळीच ओळखून प्रतिबंधात्मक कार्यवाही करणे अधिक महत्त्वाचे आहे. नागरिकांचे जीवित सुरक्षित ठेवण्यासाठी संबंधित विभागाने बीड बायपासची प्रत्यक्ष पाहणी करून धोकादायक ठिकाणांची ओळख पटवावी आणि आवश्यक दुरुस्ती व सुरक्षा उपाययोजना तातडीने पूर्ण कराव्यात, असे आवाहन मुक्तार अजीम कुरैशी यांनी केले आहे.

निवेदनातील प्रमुख मागण्या :

- तुटलेले व गायब झालेले लोखंडी सुरक्षा कठडे दुरुस्त करणे आणि नवीन कठडे बसविणे.

- रशीद मामू कॉम्प्लेक्स, पटेल लॉन्स व बजाज हॉस्पिटल परिसराची विशेष पाहणी करणे.

- अपुरी पथदिव्यांची प्रकाशव्यवस्था सुधारणे.

- अपघातप्रवण ठिकाणी नियमानुसार गतिरोधक बसविण्याबाबत निर्णय घेणे.

- वेगमर्यादा, सावधानता फलक, सुरक्षा चिन्हे व परावर्तक बसविणे.

- संपूर्ण बीड बायपास मार्गाची सुरक्षा तपासणी करून धोकादायक बाबींवर तातडीने कार्यवाही करणे.

निवेदनकर्ता : मुक्तार अजीम कुरैशी

समाजसेवक तथा आरोग्यसेवक, छत्रपती संभाजीनगर (औरंगाबाद)